Connect to Us LinkedIn Youtube RSS

22-2011 - KvK tin eleccion pa directiva
  • PDF
  • Print
  • Email

Oranjestad – Tur aña Camara di Comercio y Industria (KvK) ta tene eleccion parcial di directiva, segun un schedule fiho. Cada aña un parti di e directiva di KvK ta baha, segun un sistema rotativo unda cada vez tres di e nuebe puestonan ta bira vacante. Esaki ta duna oportunidad pa miembro nobo drenta pa contribui na trabao di KvK, pero di otro banda manteniendo continuidad den directiva. Riba 31 di december 2010 e siguiente miembronan ta na turno pa baha: Robert Carrasquero y Satish Daryanani pa "Grootbedrijf" y Francisco de Mey pa "Kleinbedrijf". Conforme e stipulacionnan den Ordenanza di Eleccion di KvK ta permisible pa miembronan cu ta baha pone nan mes re-elegible.

Fuera di esaki tin dos puesto extra vacante ya cu Sheila van Veen y Angelique de Vries tambe ta laga nan puesto actual pa motivo personal relaciona cu nan respectivo carera profesional.

Pa eherce su tareanan di un manera efectivo y fructifero KvK mester di un equipo cu vision, bon preparacion y conocimento di economía y sociedad y cu ta representa e diferente sectornan economico. Pa haya sa kico ta spera di un miembro di directiva, nos ta presenta e tareanan di KvK: esaki ta un entidad huridico "sui generis"– conforme e Ordenanza di KvK – cu e tarea general pa representa comercio y industria di Aruba. KvK tin como tarea pa duna apoyo y informacion na e comerciante, tanto esun principiante como esun estableci caba. Den practica esaki ta encera entre otro fungi como consehero oficial di Ministro di Asunto Economico pa loke ta trata asuntonan socio-economico y financiero, den interes di comercio y industria en general. Alavez, KvK ta conseha e mandatario aki encuanto otorgamento di permiso di establecimento di negoshi. Tambe KvK ta duna servicio di informacion economico/comercial tanto na comunidad di Aruba como na otro interesado den exterior. KvK ta organisa actividadnan manera charla, seminario, mision comercial y exposicion. Tur esaki pa contribui na un desaroyo economico sostenibel pa Aruba. Fuera di esey, KvK tin cu cumpli cu e funcionnan y trabaonan asigna pa ley. Ehemplo di esaki ta maneho di e registro oficial di negoshi y fundacion di Aruba y e custodia di e cuentanan anual di N.V. nan cu tin obligacion legal pa deposita esakinan den archivo di KvK pa acceso publico.

E posicion como miembro di directiva di KvK ta encera un responsabilidad voluntario y gratuito, cu a cambio ta duna un oportunidad di ta envolvi y di siña mas di acerca con nos economia ta desaroya y di e manera aki yuda KvK cumpli cu tur su tareanan conforme e necesidadnan y interes di e mundo empresarial.

Actualmente interesadonan por pasa na KvK pa busca e formulario di inscripcion/postulacion como candidato. Den e periodo di 2 te cu 15 di november 2010 mester entrega esaki bek na KvK cu 15 firma di votador cu ta sostene e candidato. E votadornan aki ta esnan cu tin puesto di responsabilidad den empresa, cualnan ta registra riba e listanan di "kleinbedrijf" y "grootbedrijf" cu KvK a publica y cu ta disponible tambe riba nos website: www.arubachamber.com. Pa mas informacion tocante eleccion pa directiva di KvK, por comunica tambe cu Secretariado na tel. 582-1120, ext. 34/41.

Aruba, 13 di october 2011

Camara di Comercio y Industria (KvK)

 

 

 

By orbitalnets.com