Connect to Us LinkedIn Youtube RSS

33-2016 - Camara di Comercio a organisa su prome evento “Women in Business”
  • PDF
  • Print
  • Email
Oranjestad –  Diamars, 15 di November ultimo, Camara di Comercio y Industria Aruba (KvK) a tene un evento na KvK: ‘Women in Business’ organisa conhuntamente cu ATIA. Esaki ta relaciona cu e companianan di Hulanda (afilia na Women Entrepreneurs Netherlands) cu a tene mision comercial caminda nan a bishita Corsou y Aruba. KvK a invita diferente empresario femenino local cu lo topa cu e comerciantenan di Hulanda y asina intercambia idea, netwerk y kisas yega na un colaboracion cu otro den un ambiente dinamico. E mision di Women Entrepreneurs Netherlands ta pa promove actividadnan empresarial di hende muhe y mehora nan habilidadnan door di expande nan contactonan profesional tanto local como internacional. 
 
E evento “Women in Business” a tuma luga den auditorium y riba e balcon pafo di auditorium di KvK. Pa esaki a invita diferente companianan local representa door di e hende muhe. Como oradornan tabata invita Sra. Daphne Agius Cesareo-Lejuez, presidente di KvK kende a hiba palabra di bon bini na tur esnan presente. Sra. Michelle de Groot, presidente di ATIA tambe a dirigi algun palabra na e invitadonan. Sra. Carmen Breeveld, presidente di Women Entrepreneurs Netherlands na su turno a conta di e meta di nan fundacion, a presenta dos video y tabata hopi contento cu e evento y e presencia di e invitadonan. Sra. Breeveld a conta cu esaki ta e di cinco mision comercial cu nan a haci e aña aki. Sra. Julisa Arends-Hoevertsz a conta over Women in Leadership y Sra. Carolina Merryweather-Raven a conta over e balanse den bida personal y profesional. Pa culmina e panel di oradornan Sra. Julissa Margarita-Rudolfo a conta con pa bo ta un “Superwoman”. 
 
Despues a brinda e oportunidad pa tur esnan presente di Hulanda y Aruba conoce otro mas miho door di tene un “speed dating” caminda cada persona ta haya algun minuut pa intercambia informacion cu otro. 
 
E anochi a termina riba e balcon di KvK y tambe e sala paden caminda tur esnan presente a haya e oportunidad di network y asina estrecha nan relacionan comercial den un ambiente hopi agradabel.
Camara di Comercio ta gradici tur esnan presente y en particular e sponsornan Penha y Aruba Trading. 
 
 
Aruba, 17 di november 2016
Camara di Comercio y Industria (KvK)
   
 

By orbitalnets.com