Connect to Us LinkedIn Youtube RSS

30-2016 - No ta mira mehoracion den cantidad di registracion di negoshi te cu di tres kwartaal 2016
  • PDF
  • Print
  • Email
Oranjestad – Despues di a colecta datos a base di e cifranan di e Registro comercial te cu september 2016 Camara di Comercio di Aruba (KvK) kier informa over e ultimo desaroyonan. Manera por wak den e grafico na 2015 a registra un crecemento den registracion di negoshi di 5% compara cu 2014. E total di registracion pa 2016 te cu september compara cu e mesun periodo pa 2015 a baha y ta mustra un caida di 8%. Na 2016 a registra 2 empresa Offshore.
 
 
Ta notabel cu nos ta wak cu registracion pa un eenmanszaak y tambe pa Naamloze Vennootschap (NV) ta sigui baha den e ultimo lunanan y e total di registracion pa 2016 ta menos compara cu e ultimo 3 añanan. Registracion pa lanta un NV a bai atras cu 19% menos den 2016 y Eenmanszaak a bai atras cu 13% menos durante 2016 compara cu e mesun periodo di januari te cu september pa 2015. Pa loke ta e otro sorto di registracion manera Venootschap Onder Firma (VOF) y Aruba Vrijgestelde Vennootschap (AVV), e cantidad di registracion a keda practicamente mescos. Nan no ta duna indicacion di ta un forma preferi pa lanta un negoshi. Registracion pa e tipo Vennootschap met Beperkte Aansprakelijkheid (VBA) ta e unico cu ta sigui crece. Nos ta wak cu compara cu e mesun periodo di 2015, pa 2016 nos tin 7% mas registracion pa un VBA.
 
 
Cancelacion for di registro
Pa por tin un bista completo di e situacion den registracion ta bon pa wak tambe kico ta pasando cu e cancelacion di registro. Por nota cu gran parti di e registro cu ta wordo cancela ta di un eenmanszaak. Ora cu nos wak ki percentahe e cancelacion ta di e total negoshi activo nos ta wak cu eenmanszaak ta yega na 2% di esaki pa 2016. Sigui pa cancelacion di NV cu ta 0.5% di e total negoshinan activo. Cancelacion registra di eenmanszaak na 2016 ta forma gran mayoria pues 70% di e total di cancelacion registra. Sigui pa e tipo NV cu 20% y AVV cu 5% di e total cancelacion pa 2016. Mester bisa si cu no tur negoshi cu no ta existi mas ta inclui den e grafico aki como cu sa pasa cu nan no ta bin na KvK pa yena e cancelacion for di registro. Si un negoshi cu no ta existi mas no wordo cancela, esaki ta trece cune cu mester sigui paga tambe pa e registro di e negoshi cerca KvK.
 
 
 
* = cifranan pa 2016 te cu september 2016
 
KvK ta conclui cu e incertidumbre pa lanta un negoshi ta existi ainda. Tin hopi competencia riba mercado actual di loke ta negoshinan cu ta bende e mes un producto pero den tiendanan chikito situa den diferente bario. Ademas cu e costo pa haci negoshi pa un empresa local ta relativamente halto. Hopi hende sa cumpra nan productonan online cual ta un indicacion cu e-commerce ta haciendo impacto riba negoshinan local. E echo cu tin menos registracion di negoshi na Aruba durante e periodo te cu september 2016 ta indica esaki. Cu tur e desaroyonan andando lo mester tene na bista ki impacto esakinan lo tin riba e comercio local y cu si en berdad e reapertura di un upgrader na San Nicolas lo yuda na trece un empuhe na e situacion actual y asina ahusta e direccion cu e cantidad di negoshi registra ta bayendo te cu awor.
 
 
Aruba, 13 di oktober 2016
Camara di Comercio y Industria (KvK)
 
 

By orbitalnets.com