Connect to Us LinkedIn Youtube RSS

11-2016 - Camara di Comercio preocupa cu efecto di ley riba "All-Inclusive"
  • PDF
  • Print
  • Email
Oranjestad – Camara di Comercio y Industria (KvK) Aruba a tuma nota di un concepto di ley cu lo keda trata den Parlamento proximamente. Ta trata di un ley cu cambionan importante pa e ambiente den cual nos industria turistico (specificamente nos hotelnan) lo bay opera den futuro. Como cu ta trata di e unico pilar economico  cu ta keda nos pais actualmente, KvK ta kere cu ta importante pa trece dilanti algun preocupacion.
 
KvK a lesa e conseho di Raad van Advies riba e concepto di ley aki cu entre otro a usa e termino huridico “détournement de pouvoir” (uso di poder pa algo otro cu pa loke e ta duna), pa describi e forma inapriopia di inclui e aspecto di “all-inclusive” den e ley existente, cu ta meramente pa reglamenta benta di alcohol, aspecto di uso di espacio y aspecto di higiena den e empresanan hotelero y otro establecimento. 
Segun e concepto di ley tambe lo introduci un restriccion di 20 aña pa e duracion di un permiso pa hotel/"all-inclusive", cu lo por crea incertidumbre pa inversion den e sector aki, locual lo no ta un desaroyo desea y kizas lo por wordo studia un tiki mas di cerca. 
 
Ademas, e efecto di e concepto di ley lo wordo principalmente sinti door di e hotelnan existente, mirando cu e lo afecta directamente e flexibilidad di por reacciona riba locual e mercado ta pidi. Aki por pensa por ehempel na temporada "low season" unda hotelnan ta purba keda competitivo pa asina por sigura mas camber bendi, cu na su turno ta nifica trabao continuo pa esnan laborando den e sector. Di parti di AHATA a mustra cu e crecemento grandi di ultimo añanan den cantidad di turista no tabata den sector “all-inclusive” sino den e sector di “otro acomodacion” pa cual e concepto di ley no ta regla practicamente nada, mientras cu supuestamente e sector aki tambe mester regulacion.
 
Cualkier cambio di ley mester por tin efectonan positivo pa nos pais y nos comunidad y mester inclui participacion di esnan directamente afecta, den e caso aki e industria hotelero y esnan laborando eynan, mirando cu e sector aki ta emplea y/of impacta un gran parti di nos economia. E Memorie van Toelichting (MvT) di e concepto di ley aki ta referi na un rapport di PricewaterhouseCoopers (PWC) riba e tema aki, cu lo mester a forma e base pa e ley, y mirando e seriedad di e posibel impacto riba nos economia, lo ta deseabel pa por comparti e estudio aki cu tur stakeholder, pa asina conhuntamente por conclui si enberdad e solucionnan proponi den e concepto di ley lo por ta esun mas adecua.
 
Camara di Comercio ta spera cu gobierno ta dispuesto pa delibera riba e topico cu e partnernan concerni pa asina por prepara un ley cu lo ta beneficia tur esnan envolvi, particularmente mirando e impacto y e importancia di e sector aki pa nos economia. Historia ta mustra cu leynan cu ta wordo impone asina ta traha negativamente. Nos no por permiti pa gamble cu nos unico pilar economico.
 
KvK lo ta semper disponibel pa aporta na creacion di ley cu ta mas efectivo posibel y ta refleha e meta proponi. 
 
 
Camara di Comercio y Industria Aruba (KvK)
9 di mei 2016
 
 

By orbitalnets.com