Connect to Us LinkedIn Youtube RSS

09-2016 - Public - Private - Partnership (PPP) na Aruba (Part III)
  • PDF
  • Print
  • Email

Oranjestad– Den dos articulo anterior, Camara di Comercio y Industria (KvK) a trece un analisis extenso di e fenomeno ‘Public Private Partnership’ (PPP), unda a haci un comparacion di e experiencianan entre region di Caribe, Europa y Aruba.  Den e ultimo articulo aki nos ta resumi nos conclusionnan pa loke ta e situacion na Aruba, incluyendo nos recomendacionnan pa futuro.

Den e caso di Aruba no ta yega na tanto conclusion negativo riba e puntonan riba cual a evalua y cu ta señala como crucial pa exito di un proyecto PPP. Sin embargo tin varios punto unda nos ta yega na e conclusion cu den e experiencia na Aruba ta tempran pa por tin e informacion disponibel pa por duna un opinion funda. Esey ta e caso por ehemplo cu e aspecto di suficiente experticio, tanto riba tereno tecnico como huridico di banda di gobernacion, pa por iguala e partner priva y duna suficiente contrapeso den e proceso.

E problema mayor señala ta e corelacion entre magnitud di e total di inversion den PPP, compara cu e tamaño di economia y tamaño di gobernacion. Lamentablemente den e material analisa te awor no a topa cu evaluacion di hustamente e aspecto aki, cu sin embargo ta resulta importante.

Sin embargo, pa por haci un comparacion nos ta tuma e caso di Turkia, menciona den e analisis di EIB como un di paisnan cu mas a implementa proyecto PPP. Turkia a yega na un suma total di inversion di € 12,5 biyon te cu 2009, pa un pais di 76 miyon di habitante y un GDP di mas o menos € 600 biyon. Aruba tin menos di 110.000 habitante y tin por lo menos un suma di € 450 miyon na inversion comprometi, loke ta bay significa un peso di alrededor di 80 – 90 miyon pa aña riba presupuesto di gobierno pa un periodo cu ta varia rond di 20 aña. Per capita esaki ta un peso hopi grandi cu Aruba ta asumi como responsabilidad financiero, compara cu e otro paisnan evalua.

Tambe mester tuma na cuenta e situacion financiero general di gobernacion. Por ehemplo e peso di e prestamonan di bono y otro debe, cu ta rekeri un suma di alrededor di 210 miyon pa aña na interes so. Den e caso di e PPPnan e suma anual ta encera pago di capital y interes. Esaki ta significa hunto un suma di alrededor di Afl. 300 miyon di pago anual, riba un GDP cu awor ta acercando e nivel di Afl. 5000 miyon, cu un budget gubernamental di Afl. 1350 miyon y entrada fiho bao di e nivel ey.

Den e estudionan encontra no ta trata realmente di caso di pais asina chikito manera Aruba, cu excepcion di e islanan den Eastern Caribbean. Esaki lo mester ta un punto di atencion mayor di analisis den futuro: ki ora un pais - di e tamaño di Aruba - ta yega na su maximo di capacidad den absorbe proyecto PPP, y otro proyecto di responsabilidad publico cu tin consecuencia pa caha publico?

Otro discusion relaciona cu esaki ta cu e pagonan pa e proyectonan PPP ta reemplaza realmente e parti di presupuesto cu normalmente ta usa pa inversion. CAft ta constata por ehemplo cu inversion den presupuesto a baha te na 1% loke nan no ta considera un nivel aceptabel pa un pais. Pero talvez nos no mester mira e asunto asina, ya cu e proyectonan via PPP ta cay pafor di e scope directo di presupuesto, unda solamente e pagonan anual pa e proyectonan PPP ta aparece riba presupuesto, y no e total di e debe como debe publico directo. Si ta desea di tin un bista mas realistico di e inversionnan cu e pais ta haci, lo mester considera separa e suma cu ta inversion inicial for di pago di interes y pago pa mantenimiento. E ora tin un mihor bista riba loke realmente e partner publico ta inverti. Esaki lamentablemente no ta yuda resolve e problema cu un parti substancial di inversion, y di finanzas publico riba su mes, no ta cay mas bao di escrutinio di parlamento.

Recomendacion

Como recomendacion por propone lo siguiente:

-     Propone un analisis y evaluacion completo di tur proyecto PPP actualmente den proceso di ehecucion of conclui caba. E estudio aki lo por inclui tambe e necesidad of no di desaroya e capacidadnan specifico pa cu PPP, den termino di experticio tecnico y huridico, formacion di unidad experto dedica na PPP, etc.;

-     Propone mas transparencia den publicidad alrededor di e proyectonan. Te awor e enfasis cu ta mira ta riba e aspecto di propaganda pa e proyectonan, pero no ta duna tanto detaye tecnico y financiero. Tambe transparencia den responsabilisacion posterior eventualmente via control parlamentario;

-     Den e evaluacion ta recomenda inclui e pregunta kico ta e ‘capacidad di carga’ di un pais di e tamaño di Aruba, mirando su situacion pa loke ta GDP, presupuesto gubernamental, y tamaño di e compromisonan financiero di PPP y di otro inversion publico. Posiblemente trata na yega na datonan di otro pais den situacion comparabel cu Aruba, pa loke ta tamaño y tipo di economia.

Camara di Comercio y Industria Aruba (KvK)

23 maart 2016

 

By orbitalnets.com