Connect to Us LinkedIn Youtube RSS

07-2016 - Public - Private - Partnership (PPP) na Aruba (Part I)
  • PDF
  • Print
  • Email
Oranjestad - Cu cierto atencion Camara di Comercio y Industria  (KvK) ta siguiendo den e ultimo añanan e desaroyo na Aruba di e proyectonan entama bao di e denominacion ‘Public Private Partnership’ (PPP). Na Aruba, a introduci e modelo di cooperacion aki entre sector publico y priva cu e institucion di Stichting Onroerend Goed Aruba (SOGA), cu ta encarga cu e edificio di Husticia na Santa Cruz, sigui pa edificio di Belastingdienst na Camacuri. Despues di cambio di gobierno na 2009 a surgi e idea pa amplia e uso di e modelo aki considerablemente, cu por ehemplo e expansion y renobacion di hospital, construccion di haf di container na Barcadera, e ‘Green Corridor’ entre aeropuerto y Pos Chikito.

Mirando e discusion andando tocante e uso di e modelo aki pa planifica, financia, construi  y mantene un obra publico, KvK a dicidi di laga haci un evaluacion di proyecto PPP, tanto na Aruba como den comparacion cu otro parti di mundo, manera Caribe y Europa. Den un serie di tres recado di prensa lo trece dilanti kico ta e experiencia te awor, y kico ta e recomendacionnan pa futuro. Den e relato di awe e prome parti.

Kico ta un proyecto ‘PPP’?

Proyecto ‘PPP’ ta surgi principalmente como alternativa di financiamento, pero tambe pa busca y contrata experticio specialisa pa cierto obranan.  Anteriormente, semper gobernacion den practicamente tur pais tabata financia y implementa obranan mayor nan mes. Esaki tabatin di haci cu varios aspecto. Un di nan ta cu gobernacion mes ta asumi responsabilidad pa henter e trayecto: di planificacion, financiamento propio o busca financiamento bao responsabilidad di gobernacion, implementa y mantene e obra cu tur gasto pa gobernacion directamente.

Tambe e pakete completo den man di gobernacion tin di haci cu ‘liabilities’ – responsabilidad financiero–

cu tin ora ta asina grandi cu gobernacion mes ta sigura su mes, den e sentido cu ta paga daño y perhuicio ‘as they come along’. Esaki pasobra e gastonan di prima di seguro cerca un compania priva por ta asina grandi pa cierto proyectonan cu mihor gobernacion simplemente asumi su responsabilidad manera nan presenta.

Structura di un PPP

Den e structura di un PPP ta aparece e siguiente actornan: gobernacion, sea un of mas ministerio y/o departamento; un contratista, e partner priva cu ta bay diseña, regla financiamento, ehecuta y mantene e obra; un organismo cu ta asumi e papel di ‘propietario’ di e proyecto; den cierto caso na Aruba a scoge un fundacion. Den otro caso por ta cu e partner priva ta crea un ‘special project vehicle’ (un compania local) cu ta responsable pa ehecuta y mantene e obra; un financista externo; un institucion financiero internacional o un consorcio di financista cu ta haci e prestamo na e partner cu ta ‘propietario’ di e proyecto.

Pakico e alternativa di un ‘PPP’?

Den un proyecto ‘PPP’, e partner externo di sector priva ta cera un convenio cu e partner publico pa asumi responsabilidad pa diseño, planificacion, financiamento, ehecucion y mantenimiento di un obra. Kico ta haci esaki diferente na un obra implementa a base di un destaho publico, unda un partner priva ta keda contrata pa construi e obra? Mas bien e caracter integral di un proyecto PPP. A base di un proceso di destaho publico, gobernacion ta trata di haya un partner priva cu ta asumi henter e trayecto di implementacion di e obra manera describi aki riba, durante henter e periodo di pago di e debe.
E responsabilidad gubernamental ta esencialmente acompaña y vigila e proceso di implementacion, hayando e producto o servicio acorda, y percura pa e pago periodico tuma lugar.

Posibel bentaha

Den un PPP, gobierno no mester percura pa financiamento di e proyecto. Ta e partner comercial mester percura pa e haya un financista, of consorcio di financista, dispuesto pa financia e obra. Naturalmente cu e ‘credit rating’ di e gobierno en cuestion ta hunga un papel den esaki, ya cu ta di fondonan di gobierno e pagonan periodico mester tuma lugar, si no tin otro fuente di entrada, manera por ehemplo e ‘tol’ (peaje) cu e usuario tin cu paga si ta trata di un caretera, of ta inclui esaki di otro forma den un prijs cu e consumidor ta paga, por ehemplo un parke di molina di biento cu ta ser paga inclui den prijs di coriente. E organismo cu ta asumi responsabilidad di e debe directamente ta e fundacion of otro persona huridico cu ta ‘propietario’ di e obra. Gobierno su envolvimento ta keda consisti di e pagonan regular segun acuerdo. Esaki ta un suma cu gobierno mester pone riba su presupuesto anualmente, si no tin otro fuente di entrada directo pa e proyecto.

Un bentaha por ta e traslado di riesgo y responsabilidad riba e partner priva cu ta ehecuta. E lo mester sigura su mes contra e riesgonan posible y lo inclui esaki den e costonan di e proyecto. E aspecto aki ta un di esunnan clave den preparacion di un PPP, unda cu experticio special huridico ta un necesidad na ambos banda.

Posibel desbentaha

Por ta cu un proyecto ta sali mas caro cu ora gobierno ehecuta e obra totalmente ‘in eigen beheer’. Esey ta pasobra e partner priva mester calcula den e prijs su ‘return on investment’ cu ta encera tambe atrae e capital necesario.  Gobierno mes por fia mas barata via emision di bono, pero esey mester ta un opcion ainda, dependiendo di e situacion financiero gubernamental.

Den e caso cu  gobierno ta ehecuta un obra su mes, di tur manera lo por ta necesario pa contrata experticio externo pa por ehecuta e obra. Tambe den un obra cu gobierno ta ehecuta su mes e contratacion di partnernan priva cu experticio specialisa por surgi bastante problema huridico di reparticion di riesgo y responsabilidad, cu ta rekeri cu gobierno mester tin experticio riba e terenonan aki na su banda. Tambe den e acompañamento di e obra te na final di e trayecto ta necesario pa conta cu experticio specifico di banda gubernamental. E costonan aki tambe mester inclui pa por tin un vista cla riba e costo total den caso di un PPP, of un obra cu financiamento via gobierno mes.

Conclusion

Den e prome parti aki a enfoca riba meta y structura di un proyecto PPP. Den e siguiente edicionnan lo enfoca mas riba experiencia, positivo y negativo, den region di Caribe y na Europa, y e situacion particular di Aruba. Esaki tumando tambe na cuenta e capacidad di Aruba pa absorba proyecto PPP, en bista di su tamaño y su capacidad di pago a largo plazo.

Aruba, 16 di maart 2016

Camara di Comercio y Industria (KvK)

 

By orbitalnets.com