Connect to Us LinkedIn Youtube RSS

05-2016 - KvK preocupa pa desaroyo encuanto refineria
  • PDF
  • Print
  • Email
Oranjestad - Cu cierto preocupacion Camara di Comercio y Industria (KVK) ta observando e desaroyonan encuanto e posibel reapertura di e refineria na San Nicolas. Ya cu no ta trata di un opinion unilateral y simpel ta importante pa KvK expone su opinion a base di un analisis di e aspectonan positivo y menos positivo.
 
Gobierno di Aruba ta negociando un acuerdo cu Citgo, e filial Mericano di PDVSA, pa re-inicia operacion di e refineria den forma di un ‘upgrader’. Esaki no ta produci producto acaba sino solamente crudo di miho calidad. E conversion pa un upgrader muy probablemente ta pone un fin na perspectiva den futuro como refineria completo y diversifica. Esaki por significa cu despues di uso temporal como upgrader ta keda solamente e opcion di desmantelacion. Tambe ta importante pa señala cu PDVSA no a bandona plannan pa crea mas upgrader na Venezuela mes, solamente a pospone esakinan te despues di 2020. Produccion di crudo mehora lo keda semper mas economico pa produci cerca di e luga di origen, en bes di transporta esaki te na Aruba. Tambe e proceso di upgrading na Venezuela no ta barata, alrededor di $30 pa bari, loke ta complica e panorama, cu prijs mundial di crudo bao di S 30 pa bari. 
 
Reapertura por trece beneficio pa gobierno, empleo na e refineria, contratista y otro servicio comercial. Tambe reapertura lo por tin un influencia positivo riba nos posicion di divisa. Ta dificil pa cuantifica e beneficionan den nan totalidad awor, ya cu tin varios factor insigur, manera den volumen di procesa crudo y di empleo. Varios biaha  ta papia di perdida di 12 pa 15% di GDP na e ciere. Pero ta remarcabel cu GDP nominal na 2012 a cay cu 0,6% y na 2013 a crece cu 2%. Turismo den cantidad di persona a crece cu 4% na 2012 y cu 8,3% na 2013: pues turismo no a crece di tal forma pa compensa un perdida asina grandi. Por lo tanto no ta logico pa kere cu  reapertura lo tin un efecto positivo asina grandi riba economia.  Ademas lo cuminsa produccion te aki dos aña y aporte na economia lo keda limita den e periodo inicial.
 
Te awor no ta conoci cuanto di e capacidad maximo (235.000 bari pa dia) lo ser usa den e set up di e upgrader. Tin indicacion cu esaki por ta bastante menos. Den e negociacion di 2013 entre Valero y PDSVSA, segun informe di Reuters, tabata papia di uso parcial di e capacidad instala y di US$ 100 miyon pa por start up. Esaki ta indica e probabilidad cu por bay cuminsa cu menos capital, pero den mesun ambiente dañino den cual a para su operacion. Esey lo haci cu San Nicolas ta bolbe na e mesun situacion di contaminacion manera den pasado, incluyendo e consecuencianan pa salud di e poblacion. 
Den esaki ta importante pa señala cu a caba di aproba varios mocion den Tweede Kamer relaciona cu e contaminacion inaceptabel di e refineria na Curaçao y ta urgi gobierno pa haci algo pa tur parti di Reino cumpli cu normanan internacional pa e tipo di iindustria aki. Lo ta logico cu esaki ta aplicabel pa Aruba tambe.
 
Tampoco ta existi claridad cu e refineria den su forma nobo lo bay emplea mes tanto persona manera Valero tabatin, ni cu mester e mesun cantidad di persona cerca e contratistanan. Ta importante pa señala cu despues di e reapertura na 2011 mester a importa un cantidad considerabel di trahado pa contratista pasobra parti grandi di e empleadonan local di antes no tabata disponibel mas. 
Tambe ta existi ainda insiguridad encuanto e acuerdo definitivo di traspaso di e propiedad cu Valero. Si ta intencion pa un compania estatal adkiri e propiedad den su totalidad, ta e compania aki (y su tras Pais Aruba) ta responsabel pa desmantelacion, dia cu e planta ya no ta opera. Ta imperativo pa e acuerdo cu Valero y Citgo ta inclui un solucion satisfactorio pa den futuro por financia limpieza total pa por establece otro actividad economico riba e tereno.
 
KvK a tuma nota tambe di e constitucion di varios compania pa Citgo, pa diferente actividad economico cu tin na bista. Den esaki tambe un compania pa maneha e waf na San Nicolas como autoridad portuario, incluyendo actividad di importacion y exportacion di container pa tercera persona. Lo ta bon si por duna un aclaracion riba esaki, ya cu a comprende anteriormente cu e  autoridad aki lo a keda den man di Pais Aruba y cu Barcadera lo ta e facilidad exclusivo pa maneha container.
Ta importante clarifica e asunto di lease cu Citgo, en bista cu e empresa lo ta e partner cu ta inverti den propiedad di un compania estatal Arubano. Specificamente un clarificacion riba e relacion entre pago di lease y e ‘return on investment’ cu Citgo lo ta desea di mira pa nan inversion. No ta conoci si e sumanan menciona ta encera e inversion den e tuberia pa gas natural cu lo mester bira parti di e proyecto.
 
En bista di e cantidad di pregunta tocante e tema aki, KvK ta desea di scucha di parti di gobierno un clarificacion mas amplio. 
 
Por conclui cu reapertura ademas, hasta cu un contract di 25 aña, ta un opcion temporal cu no ta kita e obligacion di pensa riba loke mester bin despues. Posiblemente presencia di e refineria lo preveni e yegada di otro actividad economico mas duradero cu, sea no ta cuadra cu e presencia ey, of  solamente ta posibel na e area cu e refineria ta ocupa. Ta pesey cu hasta den e caso di un reapertura, cu no ta carga aprobacion di KvK sin mas, no por para e debate riba desaroyo socio-economico di  San Nicolas for di un perspectiva mas amplio, cu miras riba e periodo post-refineria. 
A pesar di e urgencia di gobierno y di PDVSA/CITGO pa yega na un acuerdo pa motibo financiero momentaneo di ambos banda, mester tene cuenta cu otro alternativa.
 
 
Aruba, 24 di februari 2016
Camara di Comercio y Industria (KvK)
 
alt
 

By orbitalnets.com