Connect to Us LinkedIn Youtube RSS

52-2015 - KvK: Relato di fin di aña 2015
  • PDF
  • Print
  • Email
Oranjestad – Aña 2015 tabata un aña bastante activo pa Camara di Comercio (KvK), caminda cu aparte di su propio actividadnan, KvK a tin contacto y reunionnan cu diferente mandatario pa haya mas claridad riba cierto puntonan y medidanan cu gobierno a anuncia. Den e comunicado aki lo duna informacion di cifras di negoshi a base di e Registro Comercial y un resumen di algun  puntonan culminante di 2015. 
 
Registracion di negoshi
Pa loke ta trata e cantidad di registracion di negoshi, durante aña 2015 por bisa cu esaki ta relativamente comparabel cu e aña anterior, cu un caida modera, unda cu un total di 1247 negoshi onshore a ser registra desde comienso di januari 2015 te cu November 2015, compara cu un total di 1295 negoshi onshore na 2014. Den registracion di eenmanszaken por nota un aumento, esta di 34 negoshi compara cu aña pasa, mientras cu e cantidad di NV, como tambe di VBA, a desminui respectivamente di 272 pa 213 y di 319 pa 307. E cantidad di cancelacion di negoshi tambe a baha compara cu na 2014 di un total di 802 negoshi pa 622 te cu November 2015. 
Segun tipo di empresa por mira mas actividad den e eenmanszaak. 
 
Actividadnan di KvK
Na Juni KvK a organisa un mision comercial cu varios empresario pa Cuba unda cu a sera conoci cu e pais Cuba y e oportunidadnan, como tambe e retonan, cu e pais aki ta enfrenta. Durante e bishita aki varios empresario a logra traha lasonan pa futuro colaboracion y KvK tambe a hasi uso di e oportunidad pa firma un acuerdo di cooperacion (MOU) cu Camara di Comercio di Cuba pa asina sigura lasonan comercial den un futuro cercano.
Camara di Comercio a celebra su 85 aña di existencia. E ‘milestone’ aki a wordo conmemora durante e Business Event di KvK ‘From red tape to red carpet’ y algun momentonan importante tanto den historia di pais Aruba, como tambe di KvK, a wordo compila den un video cu ta inclui entrevista cu algun exmiembro di hunta di directiva di KvK, un empleado cu tin 20+ aña den servicio y tambe e Presidente actual di KvK. E video aki ta accesibel riba website di KvK www.arubachamber.com 
Na luna di oktober a inicia e segundo grupo di e curso anual ‘Empresario Independiente Chikito/Mediano’. E grupo di 20 cursista ta atende les semanal tocante topiconan esencial pa adkeri conocemento den maneho di un negoshi. 
KvK tambe a ofrece e curso di administracion financiero pa principiante (parti 1 y 2) cu a duna informacion basico encuanto e parti financiero di un negoshi. Tambe, manera ta custumber, KvK a organisa varios charla cu a haya un bon acohida. E programa di charla pa 2016 tambe lo ta accesibel riba e website di KvK. 
Ambos edicion di KvK su evento anual ‘Business Plaza’ (‘Get Started’ y ‘Step Forward’) a crea basta popularidad y e aña aki tambe nan a ser bon bishita. Lo inicia cu e preparacionnan pa e edicion cu ta tuma luga den januari cu ta enfoca riba empresarionan existente y ta duna informacion di e pasonan cu por tuma pa engrandese of restructura e negoshi. Mas informacion tocante e evento aki lo ta disponibel pronto. 
KvK a participa activamente den e proyecto di Union Europeo ‘COSME’ cu ta un programa special pa stimula e colaboracion entre Small and Medium Enterprises (SME’s) di e 12 Caribbean Overseas Countries & Territories (OCT’s). E programa aki tin como meta pa duna sosten necesario na e desaroyo di SME’s pa contribui na e diversificacion y prosperidad economico di e islanan Hulandes, Frances y Ingles. E delegacion di Aruba ta consisti di Departamento di Asunto Economico y KvK y ta reuni frecuentemente cu e grupo di e proyecto aki. 
KvK a duna atencion e aña aki na un plan strategico pa un periodo di cinco aña (2016-2020). Cu esaki KvK a stipula su plan di maneho pa e añanan benidero y ta forma e guia pa e tareanan wordo ehecuta den e direccion proponi. Un empeño importante cu Camara di Comercio lo mantene ta su impulso y esfuerzo pa sigui mehora su servicio y alabes haci esaki mas eficiente cu ta posibel. Den cuadro di eficiencia lo continua cu proyectonan riba tereno di Informacion, Comunicacion y Technologia (ICT). 
 
Comercio y actividad economico en general
E aña aki a conta cu diferente reto y desafio pa comercio en general, cu a wordo confronta cu algun adaptacion di impacto, manera entre otro e introduccion di e impuesto BAZV y e parkeermeters. Ademas, ainda no ta conoci cual di e medidanan financiero lo wordo implementa, entre otro pa locual ta trata e reforma fiscal (ABB, VAS y Transactie Belasting), ni tampoco tin un indicacion na ki momento esaki lo tuma luga. Esaki ta pone cu e incertidumbre bao comercio, cu lamentablemente a reina pa casi henter 2015, ta continua y cu consecuentemente comerciantenan, tanto local como international, ainda ta cauteloso pa haci inversión, sea den renobacion o expansion di negoshi. Alabes, finansas publico ta keda un punto di gran preocupacion y e falta di claridad y transparencia di parti di gobierno ta haci e situacion ainda mas difícil, teniendo cuenta cu na e momento aki e presupuesto 2016 di gobierno no a ni wordo trata den Parlamento ainda. Sin conta cu tin indicacion di CAFT cu e cifranan preliminario cu gobierno a presenta no ta realistico y cu pa por cubri su gastonan kizas ni e medidanan anuncia dor di gobierno lo ta suficiente. Tur evaluacion/reporte di instancianan competente y independiente (manera IMF, World Bank, Fitch, Standards & Poor, etc.), ta keda indica cu ta sumamente importante y urgente pa gobierno di Aruba trece su gastonan bao control pa trata di alivia e deficit continuo cu no ta sostenibel. Ta duna e impresion di un maneho financiero Ad-hoc y ta crea instabilidad den nos clima di inversion, y consecuentemente insiguridad den potencial inversionista.  Riba esey e impuestonan ta haci Aruba mucho mas caro cu tur otro pais den nos region locual ta haci cu ta bira cada dia mas dificil pa atrae inversionista den cualkier industria cu no ta turismo.  Den e cuadro aki KvK a lansa un publicacion na luna di oktober “Aruba Business Environment: Economic Reality and Potential”, den cual publicacion ta duna un overview di haci negoshi na Aruba y ta señala e puntonan unda cu mehoracion ta necesario.
 
Pesey KvK lo sigui urgi gobierno pa duna e punto di finansas publico mas prioridad y pa trata di implementa solucionnan sostenibel a largo plazo. Participacion real di e partnernan social ta un parti sumamente importante, caminda cu gobierno mester accede pa nan forma parti di e proceso di evaluacion y comunicacion anticipa mester ta central prome cu implementacion di cualkier cambio y/o medida.  Pa logra esaki mester re-evalua e formato actual di e plataforma di Dialogo Social y tur partido envolvi lo mester compromete nan mes pa cumpli cu y ehecuta locual cu wordo acorda.
 
 
Aruba, 15 di december 2015
Camara di Comercio y Industria (KvK)
 

By orbitalnets.com