Connect to Us LinkedIn Youtube RSS

51-2015 - Camara di Comercio a reuni cu Minister President
  • PDF
  • Print
  • Email
Oranjestad – Diahuebs, 26 di november ultimo Directiva di Camara di Comercio y Industria (KvK) a reuni cu Prome Ministro, mr. Michiel (Mike) G. Eman. E reunion a tuma luga na e Acomodacion Multi Functional (MFA) na Noord  y a wordo convoca door di Prome Ministro pa duna informacion di e proyecto, como tambe pa por intercambia di idea riba otro desaroyonan reciente.
E encuentro aki a bay den bon ambiente y tabata uno hopi informativo y constructivo. Ministro Presidente a elabora riba e plan y e posibilidadnan cu MFA ta brinda como un luga di encuentro pa un y tur y tambe e funcion di “one-stop-shop”, teniendo varios servicio y departamento gubernamental bao un solo dak. 
 
Reforma fiscal
Durante di e reunion a toca diferente otro punto tambe, manera e reforma fiscal cu gobierno a anuncia, cu ta ensera entre otro e Transactiebelasting. KvK a expresa su preocupacion pa e efecto negativo cu e impuesto aki riba transaccionnan bancario lo por trece cune, ya cu pa evita di paga e impuesto por opta pa haci transaccionnan cash y cana cu placa cash (cash economy) cu na su turno lo por ocasiona un crecemento den criminalidad. E mandatario a afirma cu pa locual ta trata impuesto, no lo introduci ningun cambio prome cu fin di aña 2015 y cu eventualmente prome cu bay over na implementacion cualkier proposicion pa cambio lo wordo discuti di antemano cu e partnernan social den e plataforma Dialogo Social. 
 
Ordenacion Urbano
KvK a mustra riba e importancia di e ordenacion urbano y e necesidad pa planificacion  pa sea otorgamento di permiso, establecimento di negoshi den cierto area o desaroyo di proyectonan comunitario. KvK a informa Ministro cu e plan di e ordenacion urbano, como tambe e regulacionnan y normanan pa cu esaki, tabata den un fase avensa, pero cu e implementacion a wordo poni on hold. Prome Ministro lo informa un ke otro pa por evalua si lo retoma e proyecto aki. Ta importante pa e renobacion di edificionan y scolnan y e infrastructura en general no stagna, pesey mester conta prome cu fondonan disponibel continuo pa por haci e trabaonan necesario cu un frequencia regular.
 
Plataforma pa Inversion
Gobierno tin e intencion pa instala un plataforma pa stimula e clima di inversion na Aruba y lo invita algun organizacion, incluyendo KvK, pa forma parti di e grupo aki. KvK ta aplaudi e initiativa aki y un di e metanan principal lo ta pa genera deviza pa nos economia.
 
A base di e encuentro a señala e necesidad y por lo tanto e intencion pa regularmente tin mas dialogo cu Prome Minister, cu e meta pa por trece e preocupacionnan y puntonan di atencion dilanti, cu ta obstaculisa comercio en general y e crecemento di Aruba su economia. 
 
KvK ta gradici Ministro Presidente pa e atencion y ta reitera su disponibilidad pa dialoga y contribui den cualkier forma na beneficio di nos comunidad, nos comercio y nos pais.
 
 
Aruba, 30 di november 2015
Camara di Comercio y Industria (KvK)
 
 

By orbitalnets.com