45-2015 - Exitoso celebracion di 85 aña di existencia di Camara di Comercio From Red Tape to Red Carpet
Oranjestad, 26 di october 2015 – Diahuebs, 22 di oktober ultimo a tuma luga den e ballroom di Hyatt Regency Aruba e evento anual di Camara di Comercio (KvK), cu e biaha aki a ser combina cu e celebracion di su 85 aña di existencia. The Aruba Chamber 85th Celebration Event ‘From Red Tape to Red Carpet’ a conta cu presencia di aproximadamente 260 persona. 
 
Como maestro di ceremonia a fungi sra. Michele Brooks. Presidente di KvK, sra. Dapnhe Agius Cesareo-Lejuez, a duna un introduccion reflehando e 85 aña di existencia di KvK. Su discurso a toca tambe cierto punto crucial relata na e tema di e evento “From Red Tape to Red Carpet”.  A señala e obstaculonan cu empresario y inversionistanan ta encontra y e cambionan cu por introduci pa simplifica entre otro e proceduranan na momento di haci negoshi. Esaki ta basa ariba un ‘Business Publication’ produci pa KvK cu durante e evento a ser lansa. Siguientemente Presidente di KvK a haci entrega di e publicacion na S.E. Gobernador, sr. Fredis Refunjol. Na final di e anochi e participantenan a ricibi un muestra di aprecio cu a inclui copia di e publicacion aki den forma digital riba un USB stick. 
 
Despues di e speech di sr. Pierre Rafini di RBC Royal Bank y e presentacion di sr. Rotmar Coenraad di AFAS Software Aruba, e orador invita, sr. Xavier Debrun, a duna su presentacion cual a hiba e tema un poco mas den profundidad y a presenta algun testimonio internacional. Sr. Debrun a duna sugerencianan crucial pa crea un economia stabil y duradero. Segun su experencia como hefe interino di e departamento di supervision y asunto fiscal di IMF, sr. Debrun a señala cu e budget di gobierno mester tin stabilidad economico, caminda cu cobransa di e impuesto di diferente parti di e GDP ta sumamente importante y cu no tene cuenta cu inversionnan di infrastructura basico por descurasha inversion priva. Despues di e presentacion di sr. Debrun varios pregunta a wordo haci y sr. Debrun a duna contesta amplio na cada pregunta.
E prome parti di e anochi a wordo clausura cu un video di e historia di Camara di Comercio, sigui pa un show di baile di carnaval y un toast di Directiva di KvK hunto cu e invitadonan. Despues tur presente a haya oportunidad amplio pa netwerk y intercambia di idea y expresa nan punto di bista ariba e topiconan cu a ser presenta. Esaki a tuma luga den un ambiento ameno den patio y foyer di Hyatt Regency Aruba y a wordo acompaña pa hors’ d’oeuvres y premium drinks. E celebracion di KvK su 85 aña di existencia a culmina cu e presentacion di e banda musical ‘Buleria’ cu a crea e ambiente festivo cu un y tur a gosa di dje.   
 
Camara di Comercio kier a gradici e patrosinadornan di e evento: RBC Royal Bank, AFAS Software Aruba y Pizza Hut pa haci e evento aki posibel. Por ultimo, palabranan di gratitud ta bay tambe na tur persona cu a asisti na e ‘Aruba Chamber 85th Celebration Event’ y cu a contribui pa haci e evento aki spectacular y exitoso. Camara di Comercio kier duna elogio na tur comerciante cu apesar di tur obstaculo ta sigui haci esfuerzonan grandi pa nan negoshi por progresa y cu alaves ta aporta na economia di nos pais. KvK di su banda ta dispuesto pa sigui brinda e apoyo y sosten necesario pa contribui na esaki.  
 
 
Aruba, 26 di oktober 2015
Camara di Comercio y Industria (KvK)
alt alt alt alt alt alt alt alt