Connect to Us LinkedIn Youtube RSS

43-2015 - KvK: Ultimo desaroyonan den centro di ciudad y vecindario a crea cierto preocupacion bao di e comerciantenan (Part II)
  • PDF
  • Print
  • Email
Oranjestad, 30 di september 2015 – Durante e anochi informativo cu Camara di Comercio y Industria (KvK) a organisa recientemente encuanto e desaroyonan den centro di ciudad y vecindario, aparte di e introduccion di e parkeermeters e comerciantenan presente a duna feedback tambe di nan experencia cu e tram cu ya caba tin varios luna den funcion. 
 
Segun e comerciantenan e intencion di e tram tabata pa fungi primordialmente como un atraccion y transporte pa den Caya Grandi y vecindario, pa asina esnan cu ta hasi uso di e tram (entre otro turista) por baha, cana y shop den e diferente tiendanan riba e ruta. Sinembargo e situacion actual ta indica cu e personanan, tanto turista como local, ta haci uso di e tram mas tanto como tour y pasa tempo pa dal un buelta den centro di ciudad y ta baha for di e tram solamente ora cu esaki yega bek na e sitio caminda nan a subi e tram, locual ta hasi cu no ta cumpliendo cu e meta principal di e tram. E comerciantenan ta di opinion cu por stimula e pasaheronan pa baha di e tram si introduci algun cambio, p.e. pone e tram core segun un schedule fiho y introduci algun “halte” caminda cu e tram ta keda para pa cierto tempo y caminda cu tur pasahero ta wordo stimula pa baha for di e tram na e punto(nan) indica.  Aki lo por informa e pasahero di e posibilidad pa regresa cu un otro tram of hasta di cana bek (sea ful e ruta of parti di esaki).
 
Un otro punto cu a wordo treci dilanti ta cu ta sinti falta di sincronisacion di mercadeo y consecuentemente e turistanan no ta haya suficiente informacion di tur locual cu e diferente tiendanan y otro negoshinan tin di ofrece. Promocion di e negoshinan den centro ta wordo obstaculisa como cu no ta permiti pa parti flyers o duna material promocional na e pasaheronan den e tram.  Mester por ta posibel pa introduci un forma pa e diferente negoshinan por promove nan mes den e tram.
 
Adicionalmente varios di esnan presente a mustra riba e dificultad cu tin pa haya acceso na nan edificio pa por ehempel entrega di mercancia of pikimento di sushi. E situacion aki a haci cu varios potencial inversionista a dicidi pa no habri negoshi den centro di ciudad. Mirando cu e proyecto di tram no ta un fin riba su mes, pero mas bien un forma pa revitalisa centro di capital di Aruba, e forma cu e ta wordo opera semper mester por cumpli cu e meta aki, y sigur no obstaculisa inversion. Mester tin un forma pa acomoda e necesidadnan di e e inversionistanan den ciudad. Esaki lo por logra pa medio di comunicacion directo entre comercio y esnan responsabel pa maneho di e tram.
 
Por ultimo e comerciantenan a indica cu nan ta en espera pa gobierno finalisa e proyecto completo di embeyecimento di centro di ciudad manera a priminti inicialmente y pa implementa tur aspecto/fase di esaki cu falta ainda. Ta trata di p.e. introduci terrasnan y parkeergarages. Di e forma aki downtown lo tin un caracter unico y ta crea e oportunidad pa por competi cu e tiendanan y malls pafo di centro di ciudad. 
 
Pa logra un mihor sincronisacion entre e necesidanan di nos economia y e servicionan cu nos sector publico ta ofrece KvK ta sigui boga pa mas dialogo y a base di e feedback ricibi por mira cu tin e necesidad di parti di esnan directamente involvi pa trece nan experencia y inkietudnan na atencion di gobierno y pa conhuntamente logra e meta comun di embeyece y revitalisa e centro di Oranjestad. 
 
Manera semper, Camara di Comercio y Industria ta dispuesto pa yuda den cualkier iniciativa cu ta beneficia comercio y comunidad en general.
 
 
Aruba, 30 di september 2015
Camara di Comercio y Industria (KvK)
 
alt  alt
 

By orbitalnets.com