Connect to Us LinkedIn Youtube RSS

41-2015 - Camara di Comercio ta celebra 85 aña di existencia
  • PDF
  • Print
  • Email
Oranjestad, 8 di september 2015 – Awe, 8 di September ta marca e di 85 aña di existencia di Camara di Comercio y Industria Aruba (KvK). E temporada prome cu inicio di su existencia, e desaroyo comercial di Aruba sigur tabata conoce su obstaculonan y alavez bibando den un economia en general bastante debil. Esaki a duna empuhe pa forma un comision y boga pa un instancia manera Camara di Comercio, cu por fungi como mediador y protector di interes y desaroyo comercial di Aruba. Dicho comision tabata consisti di señor William Craane, señor Willem Plautz, señor John G. Eman y Gezaghebber señor Isaac Wagemaker, cu dia 11 di November 1929 hunto cu 28 empresario local a firma e peticion pa constitucion di un cuerpo representativo di Comercio y industria na Aruba. Esaki a resulta na e creacion di Camara di Comercio y Industria di Aruba dia 8 di september 1930, pa medio di un decreto di Gobernador di Antias Hulandes, señor van Slobbe. E institucion a cuminsa funciona oficialmente desde comienso di 1931.
 
Tareanan principal di KvK cu awendia ainda ta ser ehecuta ta provee informacion y conseho di caracter social, financiero y economico na Ministerio di Asunto Economico y na comunidad comercial di Aruba. Banda di e obligacion aki, KvK ta responsabel pa administra y supervisa e Registro Comercial y e Registro di Fundacion. Durante añanan KvK a structura y adapta varios procedura tanto riba iniciativa propio como tambe a base di leynan nobo introduci. Di sumo importancia y algo cu KvK ta poniendo enfasis sigur riba dje e ultimo añanan ta ‘customer service’. Ademas a haci uso di encuestanan tocante varios tema y traha un rapport especialmente riba mehoracion di su imagen. 
Cu esaki, KvK ta e instancia cu ademas di e obligacion regula pa ley unda cu tur negoshi mester registra su mes, ta boga pa interes di comunidad empresarial y ofrece un servicio di calidad.
 
Celebracion 85 aña di existencia  
85 aña di aniversario sigur ta motibo pa celebracion! Den cuadro di e ocacion special aki, KvK lo celebra esaki conhuntamente cu su evento anual “Aruba Chamber Business Event” ariba diahuebs, 22 di october 2015. E evento aki lo tuma lugar na Hyatt Regency Aruba Resort Spa & Casino y lo conta cu presencia di un orador internacional renombra. Tambe lo ofrece hors d’oeuvres, premium drinks, entretenimiento musical y oportunidad amplio pa netwerk. Pa mas informacion tocante “Aruba Chamber 85th Celebration Event” por fabor tuma contacto via tel. 582.1566 ext. 41/29/27; bishita www.arubachamber.com y pagina di Facebook: www.facebook.com/arubachamber.  Pa loke ta trata e fecha di awe, 8 di september 2015, tur cliente cu bishita oficina di KvK lo ricibi un atencion chikito. Na nomber di directiva y personal, KvK ta gradici Comercio di Aruba pa su confianza durante e ultimo 85 añanan y ta un honor di por sigui sirbi comunidad empresarial.
 
 
Aruba, 7 di september 2015
Camara di Comercio y Industria (KvK)
 
 

By orbitalnets.com