Connect to Us LinkedIn Youtube RSS

38-2015 - KvK: Mester mantene un balansa saludabel den tiponan di acomodacion na Aruba
  • PDF
  • Print
  • Email
Oranjestad – Camara di Comercio y Industria Aruba (KvK) a sigui discussionnan y desaroyonan riba e tema di hotelnan all inclusive, y e impacto potencial cu e ta trece pa e isla.
 
Mundialmente, e industria di turismo a conoce hopi cambio den e ultimo decadanan. E cambionan aki ta tumando luga rapidamente y esaki por wordo mira den e.o. e sector di barconan crucero, sector hotelero y e sector di transporte aereo.
 
Considerando e importancia creciente di e sector di turismo den nos economia, y pues tambe pa e bienestar di nos poblacion, ta importante pa nos gobierno guia e industria aki den e direccion cu ta mas benificioso pa e pais.
 
KvK ta consciente y ta compronde e preocupacionnan expresa door di e doño y operadornan di hotel relaciona cu e situacion actual den e sector hotelero na Aruba, y e discusionnan riba e asina yama “all-inclusive”. Ta logico cu e inversionistanan aki kier proteha nan inversionnan valioso y te desea mas flexibilidad posibel pa por maneha nan negoshinan den e forma cu nan ta considera mihor. Pero na otro banda ta bon pa nota cu e industria turistico ta mucho mas grandi cu unicamente hotels. 
 
Esnan cu a inverti den restaurant, nightclub, bar, tiendanan di retail, centro comercial, sitionan di entretenimento, companianan di transporte, etc, tambe ta wordo impacta door di cada desaroyo den e industria aki. Nan interesnan tambe mester wordo teni na consideracion door di autoridadnan concerni.
 
KvK ta opina cu nos mester mantene un balansa saludabel den tiponan di acomodacion cu nos ta ofrece na nos bishitantenan. Un exceso di e asina yama cambernan “all-inclusive” lo perhudica otro inversionista riba nos isla cu tambe ta atende y duna servicio na esnan cu ta bishita nos isla.
 
Den opinion di KvK, gobierno di Aruba mester tin e hermentnan na su disposicion pa guia nos economia den e direccion cu ta miho pa nos pais. Esaki ta inclui cambio di ley pa por maneha y regula e industria dinamico aki cu constantemente ta pasando den cambio. Gobierno di Aruba simplemente no por spera pa regula un industria di siglo 21 cu ley y reglanan di siglo 20.
 
KvK ta kere cu e cambionan aki mester wordo treci den dialogo cu stakeholders pa asina nos ta crea un futuro sostenibel, conservando nos pilar economico pa generacionnan cu ta bin.
 
 
Aruba, 29 di juli 2015
Camara di Comercio y Industria (KvK)
 
 

By orbitalnets.com