Connect to Us LinkedIn Youtube RSS

33-2015 - Mision Comercial Colombia - Aruba Exitoso
  • PDF
  • Print
  • Email
Oranjestad – Dianan 25 y 26 di juni, Camara di Comercio y Industria Aruba (KvK) tabatin e placer di ta anfitrion pa un delegacion comercial procedente di Colombia, unda e delegacion a ricibi presentacionnan y e oportunidad pa reuni cu diferente empresario local durante match making meetings. E delegacion tabatin un total di 45 cita y a keda hopi satisfecho cu e calidad di citanan ricibi.
 
E delegacion a biaha bou guia di Sr. Camilo Acevedo Rojas, kende ta Presidente di e hunta di directiva di Camara de Comercio, Colombo, Centroamericana y de El Caribe (Camara CCCC). KvK Aruba pa hopi aña tin relacionnan estrecho cu Camara CCCC, y hunto e dos organisacionnan ta purba organisa un mision casi tur aña pa fortalese e lasonan comercial entre Aruba y Colombia. E delegacion a biaha prome pa Curaçao y despues diaranson atardi a yega Aruba. 
 
E programa na Aruba a cuminsa oficialmente diahuebs mainta cu un tour rond di Aruba, pa duna un bista general di e area comercial di e isla, sigui pa un presentacion di Infrateam cu a splica mas di e plannan di gobierno pa construccion y infrastructura di Aruba. Den ora di atardi e delegacion a bishita KvK, unda nan a ricibi varios presentacion riba diferente topico manera oportunidadnan empresarial, economia di Aruba y con pa inverti na Aruba. Na final tabatin algun sesion informativo kico pa tene na cuenta ora di importa producto alimenticio na Aruba y un sesion tocante rekisitonan pa servicio medico.
 
Diabierna mainta e parti principal di e mision, cu ta e reunionnan di match making a cuminsa. Aki tur e empresario a haya oportunidad di sinta cu compania nan local, unda durante sesionnan cortico, ambos a haya oportunidad pa cera conoci y wak kico nan por siginifica pa otro. For di e reunionnan aki, varios deals y palabracionnan pa futuro cooperacion a inicia.
 
E delegacion tabata consisti di varios empresario ofreciendo producto y/of servicio den diferente ramo:  productonan alimenticio y awa potable, distribuidor di kabel y waya pa electricidad, servicio di diferente clinica medico, servicio di imprenta y publicidad, paña y accesorios pa damas.
 
Camara di Comercio Aruba ta sumamente contento cu e resultado di e mision, y ta sigui contribui na busca oportunidadnan pa empresario local y aporta na e promocion di nos isla como un destino empresarial. Por wak mas portret di e mision ariba nos facebook page, www.facebook.com/arubachamber. 
 
 
Aruba, 30 di Juni 2015
Camara di Comercio y Industria (KvK)
        
 

By orbitalnets.com