Connect to Us LinkedIn Youtube RSS

31-2015 - Recordatorio pa tur NV, VBA y AVV: 31 AUG: Deposito di cuenta financiero anual
  • PDF
  • Print
  • Email
Oranjestad – Camara di Comercio y Industria Aruba (KvK) kier recorda tur NV, VBA y AVV tocante  e obligacion pa deposita nan cuenta financiero anual (jaarrekening) y copia di nan registro di accionista (aandeelhoudersregister) na KvK dentro di 8 luna despues cu e aña fiscal termina. 
Den caso cu aña fiscal ta di januari pa december, e deadline pa deposita e jaarrekening ta 31 di augustus.
 
Den e comunicado aki, KvK kier trece dilanti e proceso pa deposita e documentonan aki un biaha mas.
 
Entrega di cuenta anual
Tur NV, VBA y AVV mester entrega un copia di nan cuenta financiero anual na Camara di Comercio. Esaki ta bai como lo siguiente:
  • E cuenta anual mester wordo firma door di tur miembro di directiva (director(nan)).
  • Si ta aplicabel, door di miembronan di e hunta di comisario (Raad van Commissarissen).
  • Despues e asamblea di accionista ta aproba e cuenta financiero durante un reunion di accionista.
  • E reunion mester tuma lugar dentro di ocho dia cu e documento keda cla.
  • Ademas, e compania mester warda un copia na nan oficina cu tin un adres na Aruba of un oficina di un representante legal. Adres mester ta conoci.
  • E periodo pa warda e documento ta diez aña. 
  • Tur accionista tin derecho ariba inzage.
Extension di periodo pa deposita cuenta anual
Si un compania no ta logra presenta e relato dentro di ocho luna, e ora e director mester yama e asamblea di accionista pa nan por pidi un extension di e periodo (uitstel). Esaki ta bai como siguiente:
  • E directiva ta haci peticion di uitstel na e asamblea di accionista. 
  • E asamblea di accionista ta decidi si ta honra peticion di directiva pa entrega e cuanta anual mas laat. 
  • E extension por ta te un maximo di seis luna.
  • Mester notula e reunion den cual e decision a ser tuma pa prolongacion (uitstel).
  • E director(nan) tin cu warda e notulen na oficina di e compania.
  • Ora e cuenta anual ta kla, e accionistanan mester aprobe durante un reunion di accionista.
  • Despues di aprobacion di e cuenta anual door di e asamblea di accionista, mester deposita e cuenta financiero dentro di ocho dia na Camara di Comercio.
Tuma nota cu KvK no ta e instancia cu ta otorga e uitstel, sino e propio accionista(nan) di e compania.
 
Si ta importante na momento cu haci peticion pa uitstel na e asamblea di accionista, pa notifica KvK di e decision tuma, por ehempel door di deposita copia di e notulen na KvK.
 
Casonan excepcional
Den caso cu e cuenta financiero ta keda cla net prome cu e deadline y no tin mas tempo pa tene e reunion di accionista, e ora e directiva mester firma e cuenta anual y deposite na KvK prome cu surpasa e deadline di ocho luna.
 
Obligacion pa deposita registro di accionista
Tambe tur NV, VBA y AVV mester entrega tambe un copia di nan registro di accionista (aandeelhoudersregister) na Camara di Comercio. E registro ta wordo firma door di e director(nan).
 
Uitstel no ta posibel
No tin posibilidad pa pidi un uitstel pa entrega e registro di accionista pasobra e documento aki mester wordo actualisa continuamente door di e directiva, asina cu tin un cambio. Pa e mesun motibo aki, ta importante pa subraya cu e registro di accionista no necesariamente mester wordo entrega hunto cu e cuenta anual.
 
Confidencialidad
E cuenta anual, registro di accionista y notulen ta documentonan confidencial, y no ta disponibel pa inzage, solamante na momento cu e compania mes duna autorizacion. Tur documentonan ta wordo warda den un area separa y segur.
 
Formulario 16
Tur documento, pues e cuenta anual, registro di accionista y e decision pa duna prolongacion por ser deposita na KvK, hunto cu formulario 16 y identificacion di un director.
 
Deadline
Por ultimo, ta importante pa añadi cu e deadline y e peticion pa extension, no ta igual cu esun di belasting. E motibo ta cu e deadline pa deposita e cuenta anual ta fiho, ocho luna despues cu e aña fiscal termina, tur aña. Belasting su deadline pa empresanan entrega nan aanslag di winstbelasting ta varia tur aña.
 
Tur empresario cu tin cualkier duda of ta desea di sa mas tocante e proceso nobo aki, por tuma contacto libremente cu KvK na 582-1566 ext. 21/22/27/30/35. Tambe por consulta nos website pa mas informacion, www.arubachamber.com/business-in-aruba/filing-of-the-annual-financial-statement.  
 
 
Aruba, 23 di juni 2015
Camara di Comercio y Industria (KvK)
 

By orbitalnets.com