Connect to Us LinkedIn Youtube RSS

28-2015 - KvK su delegacion comercial ta sali pa Cuba
  • PDF
  • Print
  • Email
Oranjestad  –  Diadomingo venidero e delegacion di Camara di Comercio y Industria Aruba (KvK) lo sali rumbo pa Cuba,  pa un mision comercial den cooperacion cu Camara di Comercio Cubano. Ta trata di un biahe di seis dia, di 7 te 12 di juni 2015, pa cual e preparacionnan a inicia desde comienso di e aña aki. Hefe di delegacion lo ta Presidente di KvK, sra. Daphne Lejuez. 
Insel Air, mirando e importancia di e ultimo desaroyonan na Cuba pa nan como empresa, a percura pa un vuelo directo charter pa realisacion di e mision comercial aki, mientras cu pronto e vuelonan regular di Insel Air pa Cuba lo inicia. KvK ta gradici Insel Air pa pone e charter directo di Aruba pa Cuba disponibel, specialmente pa e mision.
 
Meta di e mision
E delegacion ta consisti di 26 compania local, representa pa 34 persona, y ademas e representantenan y staff di KvK. Meta di e biahe ta pa siña con nos ta crea synergia entre e economia y comercio di e dos paisnan. Con e dos islanan por haci negoshi hunto y unda e oportunidadnan ta pa ambos. Pa logra e meta aki KvK Aruba y Camara di Comercio di Cuba lo firma un convenio mutuo pa asina fortalece y engrandece e cooperacion comercial entre Aruba y Cuba.
 
E delegacion lo ta na Cuba te cu diabierna 12 di juni y lo ta hospedando na Habana. Den e siman cu ta bin, e empresarionan lo ricibi mas informacion con pa haci negoshi na Cuba, kico ta retonan den e mercado nobo den nos region y mas cu claro, e oportunidadnan cu ta surgi di un mercado nobo. 
Pa esey nan lo tin cita tambe cu empresarionan Cubano, y den e programa tin actividad pa nan por siña conoce kico Cuba tin pa ofrece. 
Tambe KvK ta desea tur e empresarionan exito durante e siman aki y sigur ora nos ta back lo comparti e informacion ricibi pasobra e biahe aki ta djies e inicio di un cooperacion mutuo entre e dos camaranan di comercio.
 
Biahe di ministro di Turismo, Transporte y Cultura pa Cuba
Cu e mesun vuelo lo ta biahando pa Cuba tambe ministro di Turismo, Transporte y Cultura, sr. Otmar Oduber, pa estrecha lasonan di cooperacion cu e pais aki na nivel gubernamental. KvK ta aprecia cu di banda gubernamental ta mustra reconocimento pa e importancia di e iniciativa di KvK pa organisa e delegacion aki, y ta spera cu e esfuersonan mutuo lo yuda duna miho resultado pa Aruba. Inmediatamente despues di regreso otro siman KvK lo tin rueda di prensa pa divulga e resultadonan di e delegacion aki. 
 
 
Aruba, 05 di juni 2015
Camara di Comercio y Industria (KvK)
 
 

By orbitalnets.com