Connect to Us LinkedIn Youtube RSS

24-2015 - KvK: Mision Comercial pa Cuba ta kedando cla
  • PDF
  • Print
  • Email
Oranjestad  –   E mision comercial pa Cuba di Camara di Comercio y Industria Aruba (KvK) programa na juni venidero, ta kedando cla. Awor caba tin un grupo di alrededor di 15 empresa cu a mustra interes y ta haciendo e tramitenan necesario pa participa. Cu esaki ya caba por bisa cu e mision lo ta un exito. Empresanan cu ta interesa pa join e delegacion aki tin te dia 4 di mei proximo pa registra y cumpli cu e rekisitonan financiero pa esaki. E delegacion comercial aki lo ser encabeza pa presidente di Camara di Comercio y Industria Aruba,  Sra. Daphne Agius Cesareo-Lejuez.  
 
Empresario cu a mustra nan interes pa explora kico un pais manera Cuba tin pa ofrece ta bin di ramo completamente diferente. Por ehemplo tin interes for di sector di turismo, pero tambe di sector di logistica y transporte, agricultura, asesoria empresarial, etc. 
 
Inversion nobo na Cuba bonbini
E ultimo acontecimentonan riba tereno diplomatico entre Cuba y Merca ta cambiando e panorama pa inversion stranhero casi diariamente. Un luna pasa, gobierno Cubano dia 29 di maart 2015 a caba di pasa un ley nobo riba inversion stranhero, cual ta permiti companianan di otro pais pa inverti, exporta nan ganashi y bende eventualmente nan propiedad na Cuba libremente. Cu esaki definitivamente portanan pa inversionista di otro pais a habri. 
 
Delegacion di Aruba lo bay bishita tambe e proyecto di zona franca di Puerto Mariel, cual ta consisti tambe di un zona especial unda tin posiblidad pa establece empresa di diferente tipo (industria, importacion, exportacion) cu comercio den henter region na vista. E facilidadnan portuario lo ta basa riba ricibi e container carriernan gigante di futuro (“Post Panamax”) cu ta asina grandi cu nan no lo por pasa canal di Panama despues cu e ampliacion keda cla. Cu esaki Cuba ta reta e otro competidornan den region manera Miami, Kingston, Freeport (Bahamas). 
 
Durante e mision comerciantenan por spera hopi actividad cu ta explora kico specificamente Cuba por significa pa cada comerciante. Sea ta inversionnan of ta intercambio den producto y/o conocemento. KvK tin contacto estrecho cu Camara di Comercio na Cuba unda lo percura pa ‘match-making’ entre companianan. Pa tur e comerciantenan cu ta interesa pa participa na e Mision Comercial pa Cuba, por inscribi te cu 4 di mei 2015. E costo total pa e Mision Comercial pa Cuba aki ta Afl. 4.500,= y Camara di Comercio y Industria Aruba ta pidi un deposito di Afl. 500,=. 
 
Lo tin un descuento pa 2 persona cu ta comparti un camber (US$ 2150 pa cada persona), y pa mas di un persona di mesun empresa cu tin camber separa (US$ 2300 pa persona). Tur comerciante cu ta desea di ricibi mas informacion por tuma contacto libremente cu Camara di Comercio y Industria Aruba door di yama 582-1566, ext. 26/29 of manda un email na This e-mail address is being protected from spambots. You need JavaScript enabled to view it
 
 
Aruba, 28 di april 2015
Camara di Comercio y Industria (KvK)
 
 

By orbitalnets.com