Connect to Us LinkedIn Youtube RSS

21-2015 - KvK preparando pa Trade Mission pa Cuba. Aruba ta rico na conocemento
  • PDF
  • Print
  • Email
Oranjestad – Camara di Comercio y Industria Aruba (KvK) ta den pleno preparacion pa e mision pa Cuba cu lo tuma luga dia 7 te cu 12 di juni 2015. Embahador di Reino Hulandes na Cuba Su Excelencia Sr. Norbert Braakhuis tabata di bishita na Aruba pa asina duna un presentacion durante un anochi informativo organisa pa KvK pa comerciantenan cu tin interes di participa cu e Trade Mission pa Cuba.
 
Durante e presentacion, Sr. Braakhuis a remarca cu Aruba ta un isla cu hopi bentahanan competitivo pa explora y drenta Cuba. Su bishita tabata primordialmente pa duna informacion amplio di e situacion actual na Cuba como tambe kico por spera di Reino Hulandes na Cuba pa cu e mision aki. Sr. Braakhuis a indica cu pa un isla manera Aruba ta hopi importante pa ta al tanto di e cambionan den e sector di turismo na Cuba y con esaki por afecta Aruba. Ya caba na Cuba nan ta wak un cambio grandi di con e sector di turismo a wordo impacta despues di e anuncio di President Obama unda cu lo habri porta pa mercado Mericano como tambe e mehoracion di contacto y relacion entre Merca y Cuba. E impacto no ta solamente riba e cantidad di turista cu ta bishita Cuba pero tambe riba inversionnan cu ya caba ta wordo haci den e sector di turismo na Cuba. 
 
Situacion actual
E situacion actual ta cu Cuba ta den necesidad di no solamente habri porta pa economia, pero tambe pa modernisa e situacion actual di e economia den sectornan unda Aruba ta sumamente adelanta y na un nivel hopi halto. Segun Sr. Braakhuis, Aruba ta rico na conocemento y experencia. Aki por pensa riba conocemento den e sector di ‘Renewables’, maneho di turismo na un nivel halto y desaroya. Esakinan ta areanan di conocemento cu Aruba ta subraya y unda Cuba no tin e experencia amplio y necesario pa ta prepara pa cu e cambio cu ta na caminda pa Cuba. Cu e crecemento aki na Cuba, Aruba tin hopi beneficio competitivo cu ta hacie hopi interesante pa Aruba bay Cuba.
 
E nivel di maneho di turismo na Aruba ta un di e mihor ehempelnan di con experencia Aruba ta den e sector aki. Tambe tin otro sector manera construccion y agricultura cu ta otro sectornan cu ta priminti di conoce un crecemento rapido. Mirando e desaroyo di turismo, lo por spera hopi desaroyo den infrastructura cu ta duna companianan na Aruba cu ta den e sector di construccion hopi oportunidad. 
 
Pa cu agricultura, Cuba tin varios proyecto di ‘Organopónico’ cu tambe ta crea interes pa Aruba. Despues di colapso di Union Sovietico, Cuba tabata obliga di bira independiente den produccion di agricultura. Consecuencia di esaki ta cu Cuba a desaroya un solucion inovativo di cultivo organico urbano, ‘Organopónico’. 
Pa cu esaki por ehempel tin un compania local den agricultura, Fantastic Garden cu tambe ta formando parti di e mision pa Cuba, pa asina explora y conoce mas di loke Cuba tin pa ofrece na nan.
 
KvK ta pidi pa tur comerciante cu tin interes pa ta parti di e mision unico aki pa tuma contacto cu KvK na 582-1566 ext. 26 of manda un email na This e-mail address is being protected from spambots. You need JavaScript enabled to view it ,  prome cu 4 di mei proximo. 
 
 
Aruba, 14 di april 2015
Camara di Comercio y Industria (KvK)
 
 

By orbitalnets.com