Connect to Us LinkedIn Youtube RSS

20-2015 - 'Awor ta e momento pa explora e posibilidadnan na Cuba'
  • PDF
  • Print
  • Email

Oranjestad– Sra. Daphne Cesareo-Lejuez, Presidente di Camara di Comercio y Industria Aruba (KvK) a duna di conoce cu informacion cu nan a ricibi for di Camara di Comercio di Cuba ta cu ya caba tin hopi movemento andando na Cuba. ‘Esaki ta e momento perfecto
pa bay Cuba. Nos tin hopi beneficio siendo cu nos tambe ta den Caribe.
Nos ta papia e idioma, nos ta comparti e mentalidad y cultura Caribense.
Esakinan ta apenas algun factor cu ta hacie hopi mas interesante pa empresarionan bay haci negoshi y gana confiansa di e Cubanonan’, tabata palabra di sra. Lejuez.

Den bista di Camara di Comercio di Aruba, na e momento cu e mercado Mericano habri y consecuentemente e cantidad di turista cu nan ta spera di Merca den e añanan venidero crece, esaki lo bai significa hopi cambio pa Cuba y esaki lo rekeri hopi inversion den infrastructura y industria pa por sirbi e mercado creciente aki. Lo bay tin asina hopi posibilidad cu KvK ta kere cu awor ta e mihor momento pa bay haci sondeo con esaki por tin beneficio pa comerciante di Aruba. E mision comercial aki lo ta un mision di cera conoci cu Cuba y haci e contactonan inicial. Como un pais Latino Americano e contacto directo ta hopi importante. Pesey KvK ta stimula e contacto personal door di organisa un Trade Mission y di e forma aki cuminsa cu e prome stap.

‘Camara di Comercio di Aruba ta convenci cu despues di e prome contacto aki lo bay tin sigur mas biahe pa Cuba pa sigui crea mas contacto y fortalece esunnan actual, es mas, Camara di Comercio di Cuba ya a vocifera nan deseo pa bin bishita Aruba’, sra. Lejuez ta amplia.

Interes hopi halto

Sra. Lejuez a indica cu tin hopi interes pa e mision aki pa Cuba. Ya caba tabatin un sesion informativo informal na KvK cu tabata completamente yen y durante e anochi informativo conhuntamente cu Embahador di Reino Hulandes na Cuba, Sr. Norbert Braakhuis, nos comerciantenan a mustra mas interes den e mision aki. Mester menciona tambe cu di parti di directiva di KvK mes tin un delegacion cu ta biahando pa Cuba pa tambe explora y firma acuerdonan importante entre Aruba y Cuba cu Camara di Comercio di Cuba.

E expectativanan pa cu e mision aki ta uno grandi pero na mes momento ta consciente cu e meta ta pa explora e posibilidadnan. E biahe aki ta di 6 dia y 5 anochi y e delegacion lo wordo transporta pa Cuba via un vuelo directo cu InselAir cu ta un partner di KvK pa e mision aki. Durante e biahe pa Cuba por spera ‘business meetings’, ‘match making’, sesionnan informativo di “Doing Business” na Cuba. Tambe ta bay tin un ocasion special unda lo firma e documento oficial di colaboracion entre e dos Camara di Comercio.

Ta hopi importante pa tur comerciante cu tin interes di ta parti di e mision pa Cuba, inscribi prome cu 4 di mei 2015, pa asina Camara di Comercio por cuminsa busca y planea reunion y sesionnan di ‘Matchmaking’ y tambe garantisa cu ta haya e persona adecuado pa cada comerciante. Adicionalmente ta bay tin diferente excursion na Cuba pa asina nos comerciantenan por conoce mas di Cuba, su historia, su hendenan, cultura y arkitectura.

Aruba, 13 di april 2015

Camara di Comercio y Industria (KvK)

 

By orbitalnets.com