Connect to Us LinkedIn Youtube RSS

19-2015 - KvK: Compensacion special pa Banco Central riba cambio di divisa innecesario
  • PDF
  • Print
  • Email
Oranjestad, 13 di april 2015 – Camara di Comercio y Industria (KvK) ta di opinion cu no tabata necesario pa crea un ley nobo (Landsverordening Koersmargevergoeding Centrale Bank van Aruba) pa Banco Central di Aruba yega na suficiente entrada pa por opera. Esaki ta un cobranza nobo riba cada cambio di divisa na e banconan comercial. Por a haci esaki tambe via legislacion existente, por ehemplo si gobierno a asigna na Banco Central parti di e asina yama ‘deviezenprovisie’, cual ta caba un tipo di impuesto cu ta ser cobra riba tur cambio di divisa na e banconan comercial. E introduccion di un impuesto nobo separa ta aumenta tambe e cantidad di administracion pa tur esnan envolvi, cu extra gasto pa nan tur. 
 
Esaki ta opinion tambe di Raad van Advies den nan conseho duna na inicio di 2014 riba e concepto di ley aki. Tambe Raad van Advies ta señala cu por mira e cobranza nobo aki como un ‘verkapte belasting’ (impuesto scondi), ya cu por supone cu e banconan comercial lo bay cobra e cliente, cu ta cambia placa stranhero, e margen aki dedica na Banco Central. Esaki ta significa un peso extra riba nos economia, mientras cu gobierno ta mantene e posibilidad di keda haya for di Banco Central beneficio den forma di dividendo.
 
Dividendo
Riba e tema di dividendo Raad van Advies ta puntra su mes con por ta cu Banco Central mester di mas entrada, si na 2011 y 2012 ainda Banco Central a paga sumanan considerabel na dividendo na gobierno (total Afl. 17,8 miyon) mientras cu ta señala cu den e añanan aki caba Banco Central tabata conoce gasto mas halto di operacion. Na aña 2013 Banco Central tabatin en berdad un ganashi mas chikito cu e aña anterior, pero e ora ta menos explicabel ainda cu a paga full e beneficio aki na gobierno como dividendo, na lugar di warda esaki como reserva na Banco Central mes pa e temponan dificil nan dilanti.
 
Tambe ta remarcabel cu, mientras ta papia di gastonan di operacion mas halto como hustificacion pa e ley nobo, esey no ta e caso entre por ehemplo 2012 y 2013. Entre e añanan aki, ta principalmente e entrada di Banco Central a cay cu mas o menos Afl. 2 miyon, mientras cu e gastonan di operacion y personal practicamente no a subi. Pa mas detaye por mira e relato financiero di BCA mes (Condensed Financial Statements 2013)  riba su website: www.cbaruba.org   
 
Consulta cu partnernan social
Mientras cu den mesun periodo cu a pasa e ley nobo aki silenciosamente, gobierno tabata enfatiza continuamente e importancia di consulta cu partnernan social riba un cantidad di medida cu mester a tuma, pa por garantiza bon maneho den futuro di e.o. nos fondonan social y medico. Mientras a actua corectamente den esaki, ta parce cu ora ta menos conveniente no ta consulta e partnernan aki.
KvK ta di opinion cu e proceder den yega na introduccion di e medida innecesario aki ta ilustra bon cla con no mester maneha e tipo di asunto aki. Preferibel ta di mantene un transparencia completo envez di e introduccion silencioso di e ley aki. Tambe ta keda e pregunta con un ley nobo di impuesto ta cuadra cu e intencion (bon ricibi) di gobierno pa simplifica nos sistema di impuesto, presenta recientemente pa ministro di Finanza hunto cu prof. Vermeend. Ey no a haci ningun mencion mes di e ley nobo aki.
 
 
Aruba, 13 di april 2015
Camara di Comercio y Industria (KvK)
 
 

By orbitalnets.com