Connect to Us LinkedIn Youtube RSS

18-2015 - Den luna di Juni - Camara di Comercio y Industria Aruba ta organisa Trade Mission pa Cuba
  • PDF
  • Print
  • Email
Oranjestad, 10 di april 2015 – Diaranson ultimo den un ambiente cubano y ameno Camara di Comercio y Industria Aruba (KvK) a tene un anochi sumamente informativo encuanto un Trade Mission cu KvK ta organisa pa Cuba. E mission aki ta pa comerciante local cu ta mira Cuba como un pais cu por brinda hopi oportunidad den comercio. Cuba ta un pais sumamente rico na cultura y e situacion actual ta duna hopi posibilidad di desaroyo. Despues di e anuncio cu e mercado Mericano ta habri pa cu Cuba, lo por tin diferente consecuencia sea directo of indirecto pa Aruba. E consecuencianan aki por ta bentahoso pero tambe por ta un menasa principalmente pa e industria di turismo pa e islanan den Caribe incluyendo Aruba. Como tal KvK ta di opinion cu ta importante pa bay wak kico Cuba tin pa brinda na Aruba y viceversa, pa asina crea un base positivo  y estrecho di cooperacion entre Aruba y Cuba. 
 
Taste of Cuba
Diaranson na House of Mosaic tabatin tin un anochi informativo unda cu a ricibi como invitado special Embahador di Reino Hulandes na Cuba Su Excelencia Sr. Norbert Braakhuis. Durante un presentacion amplio y sumamente informativo Sr. Braakhuis a splica encuanto e situacion economico actual na Cuba como tambe e oportunidadnan cu Cuba ta brinda na un isla manera Aruba. Ta conoci cu recientemente a wordo anuncia cu Cuba lo bay habri porta pa mercado Mericano. Esaki ta duna oportunidad pa companianan Mericano priva establece na Cuba y haci inversion priva na Cuba. Esaki na su turno lo contribui grandemente na crecemento di Cuba su economia. Meta di e bishita di Embahador Sr. Braakhuis ta principalmente pa toca temanan importante den haci negoshi entre Aruba y Cuba. Sr. Braakhuis a splica cu ta necesario pa nos comerciantenan ta bon prepara cu tur informacion di e situacion actual na Cuba y di tur e cambionan cu ta tumando lugar y kico ta e impacto cu esaki por tin pa Aruba y pa e area Caribense en general. Tambe ta hopi imporante pa splica nos comerciantenan kico tur por spera durante e mision aki pa Cuba.
 
Durante ‘Taste of Cuba’ Sr. Braakhuis a indica cu ya caba Cuba ta experenciando hopi cambio, specificamente den e area di turismo. Cuba a cuminsa sinti e impacto despues di e anuncio cu ta habri porta pa mercado Mericano. Esaki lo trece hopi oportunidad den e area aki unda inversion grandi lo ta necesario. Sr. Braakhuis a remarca cu Reino Hulandes y Aruba specificamente ta un pais cu un bentaha hopi grandi compara cu otro paisnan Europeo y Merca. Aruba tin un nivel hopi halto den conocemento di maneho di turismo como tambe ‘Renewable Energy’. Esaki ta crea oportunidadnan unda Aruba por conduci y guia Cuba den e areanan aki. 
 
Fuera di e sector di turismo cu ta brinda Aruba hopi oportunidad pa tin un colaboracion cu Cuba, tin otro sectornan cu tambe ta interesante. Como cu companianan priva lo por haci inversion priva na Cuba, ta duna comerciantenan e oportunidad di crea cooperacion cu companianan na Cuba den e sector di construccion, agricultura y comunicacion. Aruba sigur ta conta cu experiencia y conocemento den e areanan aki tambe. 
 
Un base fuerte di confiansa entre Cuba y Aruba
Adicionalmente mester remarca cu Aruba su cultura caribense ta un cultura cu lo wordo bon acepta na Cuba. Esaki ta crea un base hopi mas fuerte di confiansa entre Cuba y Aruba.  E relacion actual entre Reino Hulandes y Cuba tambe ta uno sumamente fuerte cual consecuentemente ta contribui tambe na e confiansa den crea cooperacion entre Reino Hulandes, specificamente entre Aruba y Cuba.
 
Sr. Leo Maduro, Director di Camara di Comercio y Industria Aruba a elabora riba e fecha di biahe cu lo ta 7 di juni te cu 12 di juni. E actividadnan planea ta varia entre reunion, ‘matchmaking’, excursion y sesionnan informativo encuanto e mihor manera di haci negoshi na Cuba. Tambe Sr. Maduro a indica cu e grupo lo haci diferente bishita interesante na por ehempel un proyecto di ‘Organoponico’ y como tambe Puerto Mariel (Zona Franca). Finalmente por conclui cu e oportunidadnan cu Cuba tin pa brinda ta di interes grandi pa comerciantenan local explora. E Trade Mission pa Cuba lo tuma lugar dia 7 di juni pa 12 di juni 2015. Ultimo dia pa inscribi pa e mision aki lo ta dia 4 di mei 2015. E costo total pa participa na e mision aki ta Afl. 4500 y Camara di Comercio ta pidi un deposito di Afl. 500. Camara di Comercio ta gradici Insel Air cu a bira un partner den e Trade Mission aki, cu porcierto tambe lo inicia nan buelonan directo pa Cuba. Sr. Maduro ta gradici gerencia di Insel Air pa nan disposicion pa ta parti di e mision importante aki. 
 
Camara di Comercio ta conseha tur comerciante cu tin interes pa participa, pa inscribi na tempo pa asina por cuminsa prepara e reunionnan debidamente. Tur comerciante cu ta desea di ricibi mas informacion por tuma contacto libremente cu Camara di Comercio door di yama 582-1566, ex. 26, of manda un email na This e-mail address is being protected from spambots. You need JavaScript enabled to view it  
 
 
Aruba, 10 di april 2015
Camara di Comercio y Industria (KvK)
                
 

By orbitalnets.com