Connect to Us LinkedIn Youtube RSS

14-2015 - KvK: Nochi di informacion delegacion comercial pa Cuba
  • PDF
  • Print
  • Email
Oranjestad, 26 di februari 2015 – Camara di Comercio y Industria Aruba (KvK) a logra recientemente establece e contactonan necesario na Cuba pa por prepara un delegacion comercial pa e pais aki. A establece relacion cu Camara di Comercio di Cuba y tambe cu embahada di Reino Hulandes na La Habana, cu den ambos caso a compromete pa duna nan apoyo completo na e proyecto aki.
Pa por duna informacion na tur interesado lo mas pronto posibel, KvK lo organisa un nochi di informacion diaranson 4 di maart venidero, den auditorio di KvK.
 
Di banda di Camara di Comercio di Cuba a indica cu un mision entre dia 8 y 12 di juni proximo lo ta mas cu bon bini cerca nan. Por lo tanto KvK a tuma e decision pa lidera y organisa un delegacion comercial pa Cuba entre e fechanan menciona. E delegacion lo ta bao liderazgo di Presidente di KvK, Sra. Daphne Lejuez y lo consisti di varios persona mas di KvK, tanto di personal como miembro di directiva.
 
Meta di e delegacion
E meta di e delegacion comercial aki ta primeramente pa sondea e posibilidadnan existente den comercio en general, pero cu enfoke especial riba turismo y servicio relaciona cu turismo, produccion agricola y produccion industrial. Tambe lo tin como obhetivo pa yega na un acuerdo di cooperacion entre 
Camara di Comercio di Cuba y KvK cual lo ta e base pa continua e cooperacion comercial entre Cuba y Aruba den futuro.
 
Invitacion na empresario interesa
KvK ta desea di invita tur empresario interesa den participa den e delegacion di exploracion aki pa Cuba, pa un nochi di informacion riba diaranson venidero dia 4 di maart, di 6or pa 8or den auditorio di KvK.
Durante e encuentro aki lo duna tanto informacion tocante haci comercio cu Cuba, como informacion concreto tocante e biahe.
 
Ta pidi tur interesado encarecidamente pa duna conocimento di nan interes na KvK: via telefon: 
582-1566, ext. 26, of via e-mail: This e-mail address is being protected from spambots. You need JavaScript enabled to view it of via nos website: www.arubachamber.com
Lo tin posibilidad tambe pa intercambia di idea cu otro posibel participante na e delegacion  despues di e presentacion. 
 
 
Aruba, 26 di februari 2015
Camara di Comercio y Industria (KvK)
 

By orbitalnets.com