09-2015 - KvK: Reaccion riba rapport preliminar IMF
Oranjestad – Camara di Comercio y Industria (KvK) tabata un di e institucionnan cu a reuni cu delegacion di Fondo Monetario Internacional (IMF) durante nan bishita recien na Aruba. Mientras tanto, e rapport preliminar di e delegacion a keda publica dia 13 di februari ultimo. KvK ta desea di ‘highlight’ e pasahenan mas importante di e rapport aki, y añadi algun comentario.
 
1. E crecemento economico fuerte di 2013 a baha di mas di 4.5% na 2014. Aunke turismo a sigui crece fuerte, un bahada amplio den otro sector a tuma luga, pa motibo di falta di confianza, incertidumbre encuanto maneho fiscal y retraso den inversion. IMF no ta duna un cifra exacto kico e crecemento di GDP pa 2014 lo tabata.
2. Crecemento economico na 2015 ta proyecta pa ‘subi te na 2.25%’. Turismo lo sigui crece, pero na un paso mas modera compara cu ultimo dos aña (2012, 2013). Demanda local por mehora si incertidumbre tocante maneho fiscal mengua y algun proyecto PPP (Green Corridor, Ringweg) yega na ehecucion. 
3. Deficit fiscal a logra baha te 5.25% di GDP na 2014, a base di baha gasto di ‘bienes y servicio’ y e reforma di fondo di pension APFA. A pesar di esaki debe publico a surpasa 80% di GDP aña pasa. 
4. Gobierno tin planea pa consolida su posicion financiero considerablemente na 2015. Ta intencion di reduci deficit te 3.75% di GDP, a base di cambio den derecho di empleado publico y reduccion di nan cantidad. 
5. Medida structural grandi ta necesario pa cambia rumbo di debe publico a mediano plazo. Mester yega na un surplus manera gobierno tin proyecta pa 2018 y mantene esaki por lo menos te 2020 pa por baha debe te mas o menos 70% di GDP. Sin embargo, e obhetivonan aki no por ser logra cu e medidanan actual. Sin medida adicional, deficitnan lo keda halto, y debe lo sigui crece a mediano plazo. Gobierno ta insisti cu nan plan pa ahuste a mediano plazo ta contene e medidanan necesario pa logra nan metanan. IMF obviamente no ta comparti e opinion aki.
6. Pa yega na e metanan fiscal aki lo exigi tanto medida pa aumenta entrada, como medida pa baha gasto. Segun IMF, tin espacio pa aumenta entrada via impuesto indirecto. Na banda di gasto, gasto di personal lo tin prioridad mirando e tamaño di e payroll.
7. Aruba lo enfrenta problema grandi a largo plazo pa motibo di poblacion enveheciendo y legislacion laboral demasiado rigido. Ta recomenda desaroyo di un maneho di migracion laboral sostenibel y reduci ‘cost of doing business’.
 
Di su banda, KvK ta reconoce den e rapport varios punto cu a ser discuti ampliamente cu e delegacion di IMF. IMF ta expresa e mesun preocupacion cu tin den e carta recien di College Financieel Toezicht (CFT) unda ta evalua e medidanan programa pa gobierno (lista di 24 medida di e meerjarenprojectie). Ta yega na conclusion cu e medidanan no ta suficiente pa cambia rumbo di e debe publico. Den su rapport di aña 2010, IMF su ‘worst case scenario’ tabata cu Aruba lo a yega na un debe di 75% di GDP na fin di 2015. Awor nos ta riba 80% caba na fin di 2014, y rumbo pa 90%, si no sucede algo drastico pa bira e timon di e barco (Favor di mira grafico aki bao). 
alt
NB: KvK a añadi solamente e liña color biña cu ta indica crecemento real di debe desde 2011. E demas graficonan ta original di e rapport 2010 di IMF
 
Un di e medidanan cu KvK tambe a trece dilanti varios biaha den ultimo añanan ta e reduccion di gasto di personal cu gobierno lo mester aplica. A corta severamente caba den ‘bienes y servicio’ y gasto di interes na 2015 lo subi considerablemente compara cu 2014. 
Tambe IMF ta menciona e problemanan di mercado laboral (legislacion  rigido y migracion laboral) y ‘cost of doing business’, causa pa procedura largo y costoso den gobernacion pa tur tipo di permiso.
 
KvK ta di opinion cu mester yega na un plan mas exacto pa Aruba sali for di e crisis financiero gubernamental aki. Esey lo por termina cu e actual incertidumbre cu ta stroba inversion den sector priva y ta stroba desaroyo economico. Tambe e plan lo mester mustra unda gobierno lo bay tuma medida pa aumenta entrada, y unda ta corta gasto. Sin corta gasto lo no tin un base pa hustifica e sacrificio cu lo pidi di e ciudadano y e empresario. 
Banda di cierto elogio pa pasonan tuma caba (AOV, AZV) e rapport aki ta mustra cu ta keda hopi pa haci pa Aruba sali for di e crisis aki, cu no ta un crisis economico, sino un crisis di finanzas publico, y cu por lo tanto mester ser atendi como tal. 
 
Aruba, 17 di februari 2015
Camara di Comercio y Industria (KvK)