Connect to Us LinkedIn Youtube RSS

04-2015 - KvK: Empresarionan contento cu Business Plaza Step Forward
  • PDF
  • Print
  • Email
Oranjestad, 20 di januari 2015 – Diasabra, 17 di januari 2015, Camara di Comercio y Industria Aruba (KvK) a organisa su evento bi-anual, Business Plaza. E presidente nobo di KvK, Sra. Daphne Agius Cesareo-Lejuez, a habri e di tres edicion di Business Plaza Step Forward. Tabata un bunita coincidencia cu Sra. Agius Cesareo-Lejuez ta tambe e di tres presidente femenino di KvK. 
 
E presidente a papia ariba e importancia di Camara di Comercio pa duna sosten na esnan cu tin intencion pa expande y innova nan negoshi. Sra. Agius Cesareo-Lejuez a sigui conta cu den 2015 KvK ta continua expande su servicio na empresario. Un bon noticia pa e aña aki ta cu probablemente lo introduci e ley cu ta permiti firma digital na Aruba. Cu realisacion di e ley aki, KvK por realisa su meta di digitalisacion, unda e empresario por entrega y haya documentonan di KvK door di djis primi “submit”.
 
Un otro bon noticia cu e presidente di KvK a comparti cu e publico ta cu KvK ta haciendo un esfuerzo grandi riba tereno di training y coaching pa SMEs y alavez KvK ta trata di avanza den creacion di un fondo di inversion pa empresa chikito, e asina yama “micro-financing”. Mas den aña, KvK lo publica mas tocante e fondo aki.
 
E di dos presentacion tabata di NV Elmar, sponsor di Business Plaza Step Forward, kende a comparti un poco di nan filosofia nobo, cu ta pa Elmar tin un relacion mas estrecho cu tur nan clientenan. Por medio di e Business Plaza, nan ta spera di por a yega mas serca di e empresario local pa por ofrece nan un mihor servicio, logrando cu nan ta sirbi cada un su necesidad individual.
 
Den e programa di mainta e empresario por a atende varios presentacion cu topiconan interesante y importante pa nan negoshi, manera un success story di re-oganisacion y asina expancion di negoshi, franchising, bon maneho ta bon negoshi y e ley nobo di belasting cu ta trata “ketenaansprakelijkheid”. Manera custumber, atardi tabatin workshops, cu a trata e topiconan di innovacion den negoshi; e obligacion pa deposita cuenta anual y registro di accionista na KvK.
 
Durante e dos pauzenan, e empresarionan presente a haya oportunidad pa netwerk y combersa cu otro y cu e profesionalnan presente. Di e reaccionnan recibi a resulta cu e empresarionan a keda contento cu e contenido di e Business Plaza Step Forward aki.
 
Camara di Comercio kier bisa danki na su sponsor NV Elmar y na tur esnan cu a yuda nos realisa un otro exitoso Business Plaza: Daniele Ferrara di Gianni’s Group, Nienke ten Bruggencate di KPMG, Raymond Maduro di EQ3, Ritza Lopez-Hernandez y Cesar Angela di Hernandez Angela Accountants & Tax Consultants, Rishi Ramsoondar, business coach. Por ultimo KvK kier bisa danki tambe na consultants di Aruba Free Zone NV y Departamento di Asunto Economico cu tabata presente pa duna informacion general.
 
Pa esnan interesa pa cuminsa cu nan negoshi, Business Plaza, Get started, ta planea pa diasabra, 4 di juli 2015. Keda pendiente! 
 
Aruba, 20 januari 2015
Camara di Comercio y Industria (KvK)
 
alt alt alt altalt alt
 

By orbitalnets.com