Connect to Us LinkedIn Youtube RSS

37-2014 - Cera conoci cu docente di curso Empresario Chikito/Mediano: Patrick Melchiors
  • PDF
  • Print
  • Email
Oranjestad –  Algun siman despues di inicio di e curso Empresario Independiente Chikito/Mediano ya algun topico interesante a ser presenta na e participantenan, unda cu nan por a haya un bista riba aspectonan clave cu ta hunga un rol ora di cuminsa cu un negoshi. 
 
Como topico di introduccion, naturalmente a duna splicacion tocante Camara di Comercio su tareanan diario pa cu e empresario, kico ta e responsabilidadnan di un doño/director di un negoshi y diferente caracteristica di entidadnan legal na Aruba. Tambe a elabora riba e diferente permisonan di negoshi cu ta necesario pa establecimento di negoshi y tambe permiso specifico cu ta requeri a base di e actividad comercial, manera por ehemplo permiso pa opera un restaurant.
 
Den su encargo pa cubri e lesnan tocante mercadeo, sr. Patrick Melchiors ta haya ta importante pa un empresario, especialmente esun nobato, ta suficientemente educa ariba tereno di ‘entrepreneurship’ y tur locual esaki ta trece cu ne. Pa bo por tin un bon base di conocemento general pa maneha un negoshi ta sumamente importante pa educa bo mes riba tur aspecto cu tin di haber cu un compania. Pues esaki ta e motibo principal pakico sr. Melchiors ta contento di por aporta na e curso Empresario Independiente Chikito/Mediano y participa ta su conseho mas grandi pa cualkier persona cu ta aspira pa bira un empresario.
 
Melchiors actualmente ta director di The Marketing Department Aruba. E tin un grado den ‘business management’ y tin varios aña di experiencia riba tereno di marketing y business development. E contenido specifico di e materia cu sr. Melchiors ta cubri ta ‘target group & market research’ y tambe algun sesion di ‘marketing concept y marketing mix’. 
 
Cu e conocemento amplio cu sr. Melchiors tin di e topiconan aki, participantenan lo ricibi un bon guia pa asina nan por mahena e parti importante aki cu ta mercadeo di nan negoshi.
Pa informacion tocante e curso y pa registra pa e curso 2015 por bishita e website di Camara di Comercio Aruba www.arubachamber.com 
 
 
Aruba, 2 december 2014
Camara di Comercio y Industria (KvK)
 
 

By orbitalnets.com