Connect to Us LinkedIn Youtube RSS

12-2011 - Diferente empresario di Colombia na Aruba en busca di oportunidadnan nobo
  • PDF
  • Print
  • Email

Oranjestad – Dia 23 y 24 di juni Camara di Comercio y Industria Aruba (KvK) ta ricibi un mision economico procedente di Colombia. E mision economico lo wordo encabesa door di Camara de Comercio Colombo Centroamericana y de El Caribe y tin como meta pa estrecha y mantene e lasonan comercial cu Aruba tin cu Colombia. E pais menciona ta wordo considera pais di enfoke pa loke ta trata relacionnan comercial internacional di nos pais. Tambe e mision ta ofrece e chens na nos comerciantenan pa discubri oportunidadnan nobo.

Un grupo di empresario Colombiano lo bishita Aruba durante dos dia pa investiga oportunidad pa haci negoshi cu nos isla. Den e ultimo añanan a mira un aumento di interes y di resultadonan concreto pa cu comercio entre Aruba y Colombia. Na aña 2010 Colombia tabata e di cinco pais di importacion pa Aruba despues di Merca, Hulanda, Panama y Antiyas Hulandes segun cifranan di CBS. Como tal nos por conclui cu Colombia ta un pais hopi importante pa comercio di Aruba. Tambe por nota cu den e ultimo añanan e variedad di producto procedente for di Colombia ta aumentando. Esaki ta trece oportunidadnan interesante pa e comerciante local y como consecuencia, un oferta mas interesante pa e consumidor. Camara di Comercio Colombo Centroamericana y del Caribe ta encarga cu e parti organisatorio na Colombia y lo compaña e empresarionan pa Aruba.

E coordinacion local ta na encargo di KvK cu lo percura pa tanto e agenda di citanan cu empresanan local como presentacionnan informativo pa e grupo di empresario di Colombia. Actualmente KvK ta preparando e citanan entre e empresanan di Colombia y Aruba cu lo tuma lugar diahuebs dia 23 di juni den auditorio di KvK. Ta conta riba un participacion di ocho empresa Colombiano cu en total diez representante di varios sector. Nan ta consisti entre otro di compania di produccion di bentana, di produccion di pochi plastic cu tapadera den varios tamaño, di fruta y berdura, compania di imprenta etc. Ta di cuater biaha cu tin un mision economico unda varios compania local ta bai topa cu empresarionan di Colombia. Esaki a resulta den varios cooperacion exitoso.

KvK ta sigur e mision aki lo ofrece oportunidadnan atractivo pa e comerciante local y ta invita tur empresario interesa pa topa cu un di e empresanan di Colombia pa tuma contacto cu nos via This e-mail address is being protected from spambots. You need JavaScript enabled to view it of na telefon 582.1566 ext. 27/35/42 pa mas informacion.

Aruba, 20 juni 2011

Camara di Comercio y Industria (KvK)

 

By orbitalnets.com