Connect to Us LinkedIn Youtube RSS

35-2014 - KvK: San Nicolas merece un Master Plan
  • PDF
  • Print
  • Email
Oranjestad, 03 di october 2014 – Recientemente a bira conoci cu  - despues di e ciere na 2012 -  e refineria di Valero definitivamente lo ser desmantela, y cu e propiedad completo lo ser devolvi na gobierno di Aruba. Actualmente tin negociacion tumando lugar tocante e traspaso di e propiedad. Esaki ta habri tambe un discusion nobo encuanto futuro di e instalacionnan di e anterior refineria, y e oportunidadnan cu esaki por brinda. Dentro di un vision mas amplio, esaki ta hiba nos na un discusion tocante futuro di e ciudad mes y su alrededor. 
Segun Camara di Comercio (KvK), esaki ta un bon momento pa bolbe na e discusion inicia algun aña pasa, cual tabatin como resultado e seminario unico organiza pa KvK na maart di 2013, bao di e lema: “Aruba without the refinery; planning creates opportunities”. A pesar cu tabatin hende cu no tabata apoya e idea (ainda) pa pensa riba kico lo mester sucede una vez cu e refineria lo no tey mas, un cantidad di profesional envolvi, tanto di sector priva como di sector publico, a apoya e idea di pensa di antemano riba un futuro nobo pa e parti aki di Aruba.
Mientras cu e seminario di 2013 a enfoca mas bien riba e oportunidadnan presenta riba e actual tereno di e refineria, incluyendo e facilidadnan portuario y riba tera, tambe a bin na claridad cu tabata necesario crea un vista mas amplio pa inclui otro area di importancia pa e desaroyo socio-economico necesario den e añanan venidero.
Na e momento aki, KvK ta identifica cuatro area mayor di atencion cual mester ta inclui den un ‘master plan’ integra:
1. E propiedad actual completo di e refineria; 
2. E antiguo centro comercial di San Nicolas;
3. E area di Sero Colorado, cu enfoque riba actividad turistico; 
4. E demas areanan di San Nicolas, pafor di e centro di ciudad, cu enfoque riba rehabilitacion urbano.
 
E area di refineria
E area aki tin e mayor parti di e oportunidadnan economico pa futuro, desde e actividadnan existente manera transshipment di petroleo y facilidad pa almacena producto petrolero pa distribucion na Aruba, te na posible actividad nobo manera un hub logistico pa container, facilidad pa crucero den e actual haf di San Nicolas, plus otro actividad industrial liviano cu no ta dañino pa medio ambiente riba e actual lugar di e refineria. E resto di e tereno grandi aki por ser usa pa un cantidad di otro actividad economico, di desaroyo urbano o recreativo. 
 
Centro di ciudad (downtown)
E traspaso di e area di refineria pa bira propiedad publico ta habri porta, pa promer biaha den casi un siglo, pa e creacion di un “waterfront” pa e centro di ciudad, cu un malecon, cu teraza, restaurant, etc. dunando e posibilidad na Aruba pa haya un lugar unico cu tambe lo duna bida nobo na e parti aki asina afecta. Si Aruba logra revitaliza e centro comercial aki, cu tur su riqueza di edificio estilo ‘art deco’ di añanan 30 y 40, hunto cu un ‘waterfront’ nobo, esaki lo contribui enormemente na actividad comercial tanto pa local como relaciona cu turismo. 
 
Sero Colorado
E potencial economico di e area aki ta conoci pa basta tempo caba, pero e existencia di un refineria na horizonte no tabata yuda mucho ora ta trata di desaroyo turistico. Mientras cu ta importante pa pensa di nobo riba e posibilidadnan disponible actualmente, tambe ta necesario pa haci esaki di un manera cuidadoso, tumando na cuenta e interes di pueblo arubano, por ehemplo garantizando e acceso pa localnan na e area aki como un di suma importancia pa recreo y pasatempo, mas ainda pavia di e acceso limita na e areanan parti pabao di nos isla cu ya ta ocupa pa turismo.  Tambe ta importante pa tuma na cuenta cu Aruba ya tin problema pa atende cu e fenomeno di envehecimento, causando un scarsedad di labor local disponible den añanan venidero, hasta den e caso cu nos economia no crece mes. Ta pesey cu proyectonan hotelero di gran escala, mas ainda esunnan cu ta inclui un centro comercial grandi, mester ser pensa bon, ya cu no ta recomendable pa tin un desaroyo comercial di gran escala den Sero Colorado, cu por bira un menaza pa e revitalizacion di e area comercial den centro di San Nicolas. 
 
Rehabilitacion di San Nicolas
Ora pensa y discuti e desaroyo socio-economico di San Nicolas, tin e tendencia pa no inclui e necesidad pa rehabilita e partinan na unda e hendenan di San Nicolas ta biba. Sin embargo, si corda riba e inmenso decaida cu e areanan aki a sufri den tres decada di retroceso, lo haci nos comprende cu si no duna e parti aki debido atencion, nos lo keda cu un plan di desaroyo incompleto. Na e momento aki ainda no tin claridad di unda posiblemente fondo pa rehabilitacion lo por bin, pa por drecha cas, caya y acera. Di otro banda, drecha solamente e centro comercial y crea facilidad turistico y laga e resto di e ciudad manera e ta, no ta un opcion. Henter San Nicolas mester ser eleva na e nivel apropia di bienestar socio-economico, den acuerdo cu e nivel di Aruba den su totalidad.  
 
KvK den e simannan nos dilanti lo dedica atencion na cada un di e cuatro areanan menciona.
 
 
Aruba, 03 di November, 2014
Camara di Comercio y Industria (KvK)
 
 

By orbitalnets.com