Connect to Us LinkedIn Youtube RSS

30-2014 - KvK: Bon reunion cu Ministro di Finanzas
  • PDF
  • Print
  • Email
Oranjestad – Diaranson dia 15 di October ultimo Camara di Comercio y Industria (KvK) a haya bishita di S.E. Ministro di Finanzas, mr. Angel Bermudez na sede di KvK. Durante e reunion cu sr. Bermudez a discuti ampliamente e situacion financiero-economico di Aruba, cu enfasis riba situacion financiero di gobierno. 
Preocupacion grandi ta, manera treci dilanti na varios ocasion pa KvK tambe, e problema di gasto di personal cu ta consumiendo mas di mitar di presupuesto di gobernacion. Ministro Bermudez, tambe encarga cu restructuracion di aparato gubernamental, a expone su plannan pa gradualmente disminui e exceso grandi cu tin na personal den gobernacion, haciendo uso di e.o. un areglo di VUT (Vrijwillige Uit Treding) y un wachtgeldregeling pa esnan cu awor ainda ta den e “overtolligheidspoel”. Esakinan, hunto cu un analisis nobo di e tareanan clave di gobernacion (kerntakenanalyse) lo mester duna e instrumentonan pa maneho di e plan di reduccion di aparato gubernamental den e añanan venidero. E plannan aki sin embargo no ta contribui na resolve e problema urgente di corta gasto di personal  a corto plazo, pa cual gobierno mes a traves di Gobernador, durante su discurso na inauguracion di aña parlamentario, a anuncia un corte di 15% riba gasto di personal pa 2015. 
 
Ministro Bermudez na un manera franco a describi e problemanan grandi cu e ta mira den efectividad di Servicio di Impuesto, cual ta haci cu cobranza efectivo y na tempo no ta tuma lugar. Tin un retraso grandi di varios aña pa diferente tipo di belasting. Tambe tin un retraso grandi den maneho di reclamo/obhecion di ciudadano contra impuesto cobra. Esaki ta un problema serio pa e ciudadano cu mester haya sa cuanto e mester paga finalmente, y cuanto e por haya restitui, y pa gobierno mes e problema ta cu no tin un bon bista cuanto entrada exactamente por spera. Mehora e proceso aki ta sumamente importante pasobra mas efectivo cobranza en general ta, menos grandi e necesidad ta pa aumenta impuesto riba esnan cu ta conoci y ta pagando caba.
 
Tambe a discuti e plannan di gabinete Eman pa loke ta aumento di impuesto. Ministro Bermudez a anuncia cu pronto lo introduci e 1% di ’health tax’ pa cubri gasto di AZV, mientras cu pa 1 di januari 2015 lo tuma luga tambe introduccion di 1% di aumento di prima di AOV, di cual 50% ta pa dunador di trabao y 50% pa e trahador. Ministro Bermudez no a confirma otro medida di aumento di peso riba ciudadano o empresa. 
Riba pregunta kico lo haci cu e impuesto riba transaccion bancario ministro Bermudez a anuncia cu tin un decision pa introduci esaki, pero cu ta necesario studia tur pro y contra ainda, y cu pa mas tempran por introduci esaki na mitar di 2015, y posiblemente te januari 2016. Di banda di KvK a expresa cu ta mira varios obhecion serio contra e tipo di impuesto ainda y cu KvK lo ta desea di por expresa esakinan dilanti di e comision investigador cu ta studiando e posibilidadnan pa e reforma fiscal. En general KvK ta bogando varios aña caba pa un reforma fiscal especialmente uno cu ta orienta na crea un clima di inversion mas atractivo. Proximamente KvK lo tin un encuentro cu e comision investigado aki, segun Ministro Bermudez a segura.  
 
Un punto di coincidencia entre Ministro y KvK ta cu di ambos banda ta mira e necesidad pa simplifica y modernisa nos sistema di impuesto, pa logra mayor transparencia y cumplimiento. Riba tereno aki a papia di varios tipo di impuesto cu por considera simplifica o aboli enteramente. Por menciona por ehemplo ley riba stampia, impuesto riba dividendo, introduccion di un solo tarifa pa impuesto di importacion, etc. Tambe a trese dilanti e posibilidad di introduci un “flat tax” como inkomstenbelasting. KvK mes lo amplia riba tur e temanan aki proximamente. Abolicion di ley existente por tuma lugar a corto plazo, contrario na e trayecto di introduccion di impuesto nobo cu lo tarda mas.
 
Di ambos banda a keda acorda pa regularmente tin encuentro pa discuti adelanto di e procesonan di reforma, tanto fiscal como di aparato gubernamental. Di parti di KvK un vez mas ta gradici Ministro Bermudez pa su disposicion pa intercambia cu KvK riba e topiconan menciona. Den un proximo oportunidad posiblemente lo por elabora mas riba e perspectivanan pa e proximo añanan, a base di e plan multi-anual presenta pa gobierno di Aruba na parlamento, parlamento hulandes y na gobierno di Reino.
 
Aruba, 21 di October, 2014
Camara di Comercio y Industria (KvK)
 
 
 
 

By orbitalnets.com