Connect to Us LinkedIn Youtube RSS

32-2014 - Exitoso exposicion di arte ETNIA NATIVA na KvK
  • PDF
  • Print
  • Email
Oranjestad, 21 di october, 2014  – Camara di Comercio y Industria Aruba (KvK) por anuncia  cu satisfaccion cu e apertura di “Etnia Nativa”  dia 17 di october ultimo tabata hopi exitoso. E exposicion nobo di arte a atrae varios bishitante, kendenan a bin admira e arte contemporaneo di Sr. Anthony Croes, kende a papia personalmente cu cada un di nan. Pa esnan cu no por a bin na e apertura, e invitacion ta keda pa bin mira e arte interesante na KvK di dialuna pa diabierna, durante ora di trabao.
 
Anthony Croes ta un artista naci na Aruba y desde mucha a mustra interes grandi den arte. Sr. Croes ta busca pa trece dilanti e cultura prehistorico Arubiano, e cultura Indian, nan bida diario y e reto pa sobrevivi. E ta exprese den un forma original, usando material no-tradicional den un arte contemporaneo. Su arte ta traha di materialnan cu e ta colecta, y e ta recicla mas tanto posibel. E ta experimenta cu varios producto natural manera simiña, klei, pluma, weso, metal, palo, glas, pintura desecha, papel, piedra y tur otro tipo di material cu e por recicla. Su obranan ta refleha mas explicitamente e facilidad cu e ta combina color y composicion y su sentimento. 
 
Camara di Comercio ta haya importante apoya artistanan local pasobra arte ta fomenta creatividad, bondad y bunitesa, cu ta yuda nos expresa nos balornan y trece diferente culturanan mas cerca di otro. Esaki ta enriquece nos isla, y cu esey nos economia ta haya beneficio. 
 
Ta pa e motibo aki, Camara di Comercio a haya ta importante pa invita publico en general pa presencia e inauguracion di Expo Etnia Nativa. Tur bishitante a haya oportunidad pa wak e pinturanan y obranan di Sr. Croes mientras nan a pasa un rato ameno den compania di otro hendenan cu e mesun interes y gosa di snacks y un bebida cu tabatin disponibel.
 
Pa medio di e comunicado aki, KvK kier probecha pa bisa danki na Sr. Croes pa exhibi su arte bunita den nos edificio. Tambe danki na tur esnan cu a bishita Expo Etnia Nativa diabierna ultimo.
 
E expo ta keda habri pa publico durante KvK su oranan di oficina, di dialuna pa diabierna, cuminsando for 8:00 am pa 4:30 pm. Tur diamars, nos ta habri te 6:30 di atardi.
 
Bishita www.facebook.com/arubachamber pa por wak e potretnan di e expo. Esnan cu tin interes pa haya sa mas tocante Sr. Croes y su Etnia Nativa, tuma contacto cu ne na www.etnianativa.facebook.com. 
 
 
Aruba, 21 di october 2014
Camara di Comercio y Industria (KvK)
 
 

By orbitalnets.com