Connect to Us LinkedIn Youtube RSS

26-214 - KvK: Tempo pa ‘Bill of Rights’ pa pasahero?
  • PDF
  • Print
  • Email
Oranjestad, – Camara di Comercio y Industria a tuma nota di varios keho, di tanto ciudadano individual como di empresario local riba e situacion dificil den transporte aereo, especialmente entre e islanan y tambe pa paisnan bisiña riba continente.
E reclamonan ta concentra mas tanto riba maneho di e casonan di retraso y/o cancelacion di vuelo, cu ta hiba na perdida di vuelo di conexion, imposibilidad pa yega destino final mesun dia, cu consecuencia di mester hospeda den hotel, gasto extra, etc. 
 
E aspectonan mas menciona ta e trato di parti di personal di e lineanan di aviacion, variando di tardanza den anuncia retraso, no mencionando e tipo ni duracion di retraso cu ta bay tin; cancelacion di vuelo completo y falta di claridad y cooperacion pa yega na alternativa pa cancelacion. 
Den caso di retraso grandi ta surgi e posibilidad pa biaha cu otro vuelo, cu pa via di e retraso lo sali prome cu e vuelo retrasa mes. Ta sinti cu no semper e compania ta trata e asunto cu diligencia, pa purba reduci e molester pa e pasahero mas tanto posibel, reglando posibilidad pa cambia pa e otro vuelo cu por percura pa e retraso pa e pasahero ta menos cu den caso di sinta warda te ora e vuelo original mes tuma luga. Esaki naturalmente ta solamente posibel segun cu tin cupo disponibel den e avion di e vuelo alternativo. 
Tambe ultimamente mas y mas aerolinea ta cuminsa cobra pa maleta, pero no semper ta keda cla kico ta e derecho di e pasahero ora su maleta perde of yega cu daño.
 
En todo caso ta di comprende cu un pasahero, cu ta perhudica caba pasobra e no ta bay yega na e ora stipula y talbes tin compromiso planea di antemano na e luga di destino, por conta riba maximo colaboracion di e linea aereo pa resolve problema unda cu esey ta posiblel. Esaki no solamente como gesto di cortesia, sino tambe pasobra retraso por tin consecuencia financiero pa e pasahero, sigur pa por ehemplo empresario cu ta biahando pa asunto di negoshi.
 
Bill of Rights pa pasahero?
Talbes ta bira tempo tambe pa cuminsa pensa riba regulacion den ley di derecho di pasahero, den caso di p.e. retraso/cancelacion di vuelo, pero tambe den caso di perdida di maleta o otro pertenencia, etc. 
Nos por observa cu na otro pais ya caba ta existi regla pa esaki, manera ta e caso na Europa, unda e Comision  Europeo cu ta atende tambe transporte, a formula regla pa pasahero, no solamente pa aviacion, sino pa otro manera di biaha como por ehemplo barco, trein, etc. E reglanan di Comision Europeo ta encera aspecto manera trato pa pasahero cu limitacion fisico, retraso, cancelacion, maneho di ekipahe, y transparencia di prijs.
Nos no mester copia tur cos manera e teritorionan grandi aki ta haci, pero nos mester por adapta e reglanan aki pa nan ta adecuado pa uso den nos situacion di pais chikito. Imposicion di regla general lo tin e bentaha cu e ta aplicabel pa tur aerolinea, di tal manera cu esaki lo no tin consecuencia negativo pa posicion competitivo di ningun compania di aviacion.
 
Aruba, 9 october 2014
Camara di Comercio y Industria (KvK)
 
 

By orbitalnets.com