Connect to Us LinkedIn Youtube RSS

10-2011 - KvK’s International Expo Destination Innovation ta cla pa embarque
  • PDF
  • Print
  • Email

Oranjestad 18 mei 2011 – Ariba 27 & 28 di mei proximo lo tuma lugar e Expo International: “Destination Innovation” di Camara di Comercio y Industria Aruba (KvK) den Renaissance Convention Center. E biahe inovativo aki lo tuma lugar ariba diabierna di 2’or te cu 6’or di atardi y diasabra di 10’or di mainta te cu 6’or di atardi. Aruba en general ta cordialmente invita pa bin mira un variedad amplio di inovacion presenta pa companianan local pero tambe di Corsow, Boneiro y Merca. Sponsornan di e evento ta 24ora.com y Aruba Social Media.

Expositornan

E expositornan lo presenta inovacionnan entre otro ariba tereno di energia, technologia, agricultura, aplicacion di software, productonan/servicionan pa hotel y restaurant, recurso humano y tambe productonan pa e consumidor. E variedad di sector presente durante e exposicion ta mustra e cantidad di empresarionan cu ta inova exitosamente y asina yuda nan negoshi crece. Ademas di compañianan di Aruba, lo tey tambe presente compañianan di Curacao, Merca y Bonaire. Entre e bishitantenan lo tin tambe representacion di empresarionan di Colombia. Esaki ta subraya e necesidad di cooperacion den nos region. E apertura di e exposicion lo wordo haci door di Minister di Asuntonan Economico, señora M. Hooyboer-Winklaar.

Science Fair

Studiantenan di EPI, unit Sciencia & Technologia a percura pa e entrada di e Convention Center hiba e bishitante na “Destination Innovation” den un forma creativo unico, e bishitante lo sinti realmente cu e ta embarcando riba un biahe. Na momento cu e bishitante drenta e sala di exposicion e ta yega su destino: Inovacion. Entre otro por admira e 10 mihor proyectonan di e Science Fair di Colegio EPI di e aña aki. E studiantenan lo tey pa splica y demonstra e bishitante nan creacion.

Presentacionnan

Banda di e exposicion, e bishitante por atende presentacionnan specifico di inovacion durante henter dia di varios compania cu lo inspira un y tur. E solucionnan inovativo cu ta presenta por ta riba tur tereno cu ta toque, tanto den su bida profesional como personal. E grupo ganador di e Sustainability Projects di Universidad di Aruba tambe lo tey pa duna un splicacion ariba e contenido y balor di nan proyecto. KvK ta invita un y tur cu tin interes pa siña mas di inovacion na Aruba y den region pa asina por aplica esaki tambe den nan bida diario y den nan negoshi. E mundo di awendia ta cambia continuamente y ta trece desafio pa e ser humano. Esey ta haci cu nos tur mester bira mas consciente di e necesidad di productonan duradero, solucionnan creativo y nos medio ambiente. Tambe e velocidad di e bida diario ta confronta nos cu e limitacionnan di nos recursonan y e necesidad pa implementa alternativanan inovativo.

Premio atractivo

Cada bishitante di e expo lo tin chens di gana premionan atractivo cu ta wordo ofreci pa varios di e participantenan di e evento manera entre otro Setar, Indira’s Skin Care, Tiara Air y Quality Dishware. Entrada pa e biahe aki ta costa afl. 5,00. Mucha te cu 12 aña ta paga afl. 2,50 y tambe studiantenan ora nan mustra nan studentenkaart.

Aruba, 18 di April 2011

Camara di Comercio y Industria (KvK)

 

By orbitalnets.com