Connect to Us LinkedIn Youtube RSS

21-2014 - Deposita registro di accionista pa NV, VBA y AVV
  • PDF
  • Print
  • Email
Oranjestad, 14 di augustus 2014 – Camara di Comercio y Industria Aruba (KvK) ta recorda tur NV, VBA y AVV ariba nan obligacion pa deposita copia di nan registro di accionista (aandeelhoudersregister) y cuenta financiero anual (jaarrekening) na Camara di Comercio. E obligacion aki ta surgi a base di un cambio di ley cu a bin na vigor despues di recomendacion di Financial Action Task Force (FATF) pa aumenta control ariba compania a base di capital (kapitaalvennootschappen) pa loke ta labamento di placa y financiamento di terorismo. E comunicado aki lo trata e entrega di e registro di accionista.
 
Obligacion pa deposita registro di accionista
Banda di e cuenta financiero anual, tur NV, VBA y AVV mester entrega tambe un copia di nan registro di accionista (aandeelhoudersregister) na Camara di Comercio. E registro ta wordo firma door di e director(nan) y un copia mester wordo entrega dentro di 8 luna cu e aña fiscal termina.
 
E registro di accionista ta wordo entrega hunto cu formulario 16, cu ta disponibel riba nos website, y un identificacion di e director.
 
Uitstel no ta posibel
No tin posibilidad pa pidi un extension pa entrega e registro di accionista pasobra e documento aki mester wordo actualisa continuamente door di e directiva, asina cu tin un cambio.
 
Pa e mesun motibo aki, ta importante pa subraya cu e registro di accionista no necesariamente mester wordo entrega hunto cu e cuenta anual. Al contrario, si e cuenta anual no ta cla prome cu e deadline di ocho luna, e registro di accionista si mester wordo entrega den e periodo stipula pa ley.
 
Obligacion pa mantene registro di accionista actualisa
Manera menciona, e directiva di e compania ta rekeri pa mantene e registro up to date. Mester warda e registro na e adres di e compania of na e oficina di e representante legal. E periodo pa warda e documento ta diez aña y tur accionista tin derecho di revisa e registro.
 
Durante henter aña tin cu mantene nomber di e accionistanan y copia di nan identificacion. Tambe nan adres, tipo di accion, derecho di voto, suma deposita y fecha di adkeri accion mester ta registra.
Door di deposita e registro di accionista tur aña, companianan ta cuminsa mantene y actualisa e informacion riba e registro, como tambe otro documentonan importante pa nan negoshi.
 
Cambio den ley
Un di e cambionan cu a wordo treci den e ley ta cu e asina yama “aandelen aan toonder” (bearer shares, acciones al portador) no ta posibel mas. Accionnan mester ta riba nomber personal di e portador. Tambe mester verifica identidad di e persona prome cu emiti accion riba su nomber, pa asina garantisa cu realmente e ta doño di e accion. Lo tin un periodo transitorio di tres aña pa cambia e “aandelen aan toonder” pa riba nomber personal.
 
Documento confidencial
Manera e cuenta anual, e registro di accionista, tambe ta un documento confidencial cu lo keda warda den un area separa y sigur. 
 
Tur empresario cu tin cualkier duda of ta desea di sa mas tocante e proceso aki, por tuma contacto libremente cu KvK na 582.1566. Tambe por consulta nos website pa mas informacion, http://www.arubachamber.com/business-in-aruba/filing-of-the-annual-financial-statement. 
 
Aruba, 14 di augustus 2014
Camara di Comercio y Industria (KvK)
 
 

By orbitalnets.com