Connect to Us LinkedIn Youtube RSS

18 -2014 - KvK su posicion riba e conflicto entre Aruba y Hulanda
  • PDF
  • Print
  • Email
Oranjestad –  Camara di Comercio y Industria Aruba (KvK) ta desea di duna, a raiz di e sucesonan di ultimo simannan den e conflicto entre gobierno di Aruba y gobierno di Reino, un declaracion publico di su punto di vista.  KvK no ta bay duna un opinion riba e aspectonan legal di e asunto, pero ta desea di enfoca riba algun otro aspecto cu ta considera mas su tereno y necesario pa atende.
 
Pa cuminsa ta importante pa tuma posicion fuerte contra e manera cu a permiti ciudadanonan expresa nan agresion contra e persona y e institucion Gobernador, mientras cu como representante di Corona e ta un di e entidadnan mas importante di nos pais y mester por conta cu respet total di un y tur. Hopi di nos ciudadanonan talvez no ta comprende cu no ta e persona cu ta Gobernador ta actua segun su opinion personal, pero ta haci esaki segun su funcion ta exigi esey. Den esaki tin un responsabilidad grandi tambe riba gobierno di Aruba mes, cu ta e promer yama pa garantisa seguridad di Gobernador, y mester a tuma accion contra cualkier persona cu ta ofende o hasta menasa persona di Gobernador, sea verbal o fisicamente. Lamentablemente nos no por a mira accion di gobierno pa preveni actonan cu tabata bay den direccion di e hecho castigabel di instigacion (“opruiing”) contra e maximo autoridad di nos pais. 
 
Tambe ta necesario pa referi na e situacion financiero-economico di Aruba. E situacion critico di finanzas publico di e momento aki no ta algo cu a surgi di nochi pa mainta, y no a cuminsa cu e accion di Gobernador pa no firma e ley di presupuesto, pero tin varios aña ta biniendo manera un mal tempo den nos direccion. Constantemente KvK den e ultimo añanan a expresa su preocupacion y desacuerdo pa e rumbo cu finanzas publico a tuma. Specificamente a mustra riba e gastonan excesivo di personal cu ta di tal magnitud cu esaki ta haci imposibel pa hiba un maneho financiero sano. Esaki a yuda ocasiona e nivel halto di debe publico cu a crea un problema grandi pa nos y e proximo generacionnan.
 
Algun tempo atras caba a bira visibel tambe cu e problemanan financiero di gobierno a cuminsa afecta sector priva mas ainda. E incapacidad di gobierno pa paga su cuentanan na tempo semper caba tabata un problema pa sector priva, unda cu esnan cu no haya pago di gobierno tampoco por paga esnan cu ta entrega bienes y servicio na nan. E situacion di ultimo simannan, unda no tin presupuesto y por lo tanto no tin prestamo internacional, por bin haci un situacion severo caba, mas grave ainda. Mester tene cuenta cu e hecho cu gobernacion den su totalidad ta e actor principal den nos economia, cu tin un influencia grandi riba circulacion di placa den mayoria di sector.
 
Awor a yega e momento pa reconoce cu tin un abismo nos dilanti, y cu mester cuminsa drecha loke no a bay segun normanan di bon gobernacion. KvK ta desea di haci un suplica grandi riba gobierno di Aruba, pa asumi su responsabilidad pa haci tur lo posibel pa remedia e situacion actual, percurando pa un presupuesto realistico, trahando cu transparencia y dunando cuenta debidamente di e maneho cu ta hiba (accountability).
 
Sin duda e proceso di reparacion lo no bay sin sacrificio, pero ta mihor para e proceso di deterioro awor, cu nos mester lamenta despues cu no a tuma accion.
 
Aruba, 18 di juli 2014
Camara di Comercio y Industria (KvK)
 
 

By orbitalnets.com