Connect to Us LinkedIn Youtube RSS

12-2014 - Tuma paso pero bon midi.
  • PDF
  • Print
  • Email
Oranjestad – Riba 15 di April ultimo durante su Business Event, Camara di Comercio y Industria a presenta resultado di un encuesta cu Profesor Michiel de Vries a realisa den cooperacion cu Universidad di Aruba, na unda a entrevista 220 comerciante local. For di e encuesta aki por a conclui cu mayoria di comerciante ta boga pa un cooperacion mas estrecho entre gobierno y comercio, pa asina por traha conhuntamente ariba retonan serio cu nos pais ta confronta.
 
Camara di Comercio ta observa "Dia di Obrero" como un dia importante y di respeta, considerando cu e ta sirbi pa conmemora e lucha cu e clase trahador a hiba pa asina por a obtene e derecho y beneficionan di cual ta gosa awe. No obstante, mester menciona si cu e importancia cu e dia tin pa e trahador, e tin tambe pa comercio pa por sigui funciona y desaroya, ya cu sin comercio, no tin trahador.
 
Siman pasa, riba Dia di Obrero, dia 1 di mei, gobierno a opta pa cera tur establecimento cu no ta horeca. Esaki a sucede na un manera unilateral ya cu partnernan comercial no a wordo consulta den e proceso pa yega na e decision aki. Sin suficiente aviso previo y sin duna comercio tempo pa reacciona y dialoga cu gobierno riba e decision aki, e mandatario encarga a duna ordo pa paralisa comercio. Gobierno no a tene consideracion cu sector priva mirando cu hustamente ariba e dia aki Aruba su waf a conta cu nada menos cu 3 barco crucero, cu miles di turista, den area di Playa.
 
Ta di lamenta cu pa motibo di e ciere obligatorio aki, e comerciante a perde un oportunidad di benta, como tal e trahador tambe a perde e oportunidad di por a gana comision, aparte di e pago extra di 250% en conexion cu un dia festivo. Banda di esaki Camara di Comercio ta di opinion cu gobierno no a duna suficiente informacion riba su maneho nobo. Apesar cu algun comerciante den area di Playa a pidi permiso pa habri nan negoshi, ya cu tin miles di turista crucero den e area, esaki a wordo nenga. E forma con a ahusta e maneho sin un splicacion previo na sector comercial no ta transparente y den cierto forma cuestionable. 
 
For di sector priva mas y mas ta biniendo señal cu e situacion comercial ta dia pa dia mas dificil, y como tal, cada dia di benta ta uno hopi importante. E benta aki no ta solamente importante pa e negoshi, pero tambe ta traduci su mes den salario pa e propio trahador y entrada di belasting pa pais Aruba.
 
Camara di Comercio y Industria ta spera di por habri un dialogo cu gobierno riba e tema di dianan oficial festivo y dianan nacional, pa evita e tipo di cambio den maneho di forma sorpresivo asina, ya cu esaki tin consecuencia negativo directo pa comercio. 
 
Ta spera cu gobierno y e minister en cuestion acepta tal dialogo na bienestar di tanto comercio como di e clase trahador.
 
       
Aruba, 07 di mei 2014
Camara di Comercio y Industria (KvK)
 

By orbitalnets.com