Connect to Us LinkedIn Youtube RSS

02-2011 - Registracion di empresa ta mantene mesun nivel
  • PDF
  • Print
  • Email

Oranjestad – For di e cifranan registra di empresa nobo na januari 2011 por observa cu no tin mucho cambio den e imagen cu ta aparece for di e cifranan di registracion di aña 2009 y 2010. Na januari 2011 a registra un total di 95 empresa nobo “onshore”, mientras cu na januari 2010 a registra 89 empresa y na 2009 101 empresa onshore. E añanan anterior 2008 y 2007 a conoce inscripcion di respectivamente 134 y 118 empresa. Esaki ta claramente un señal cu ainda Aruba su economia no ta regresando ainda na e nivel di promer cu e crisis economico internacional. 

E resultado di inscripcion di empresa nobo ta parce di sigui e pasonan di economia di Estado Uni, cual ta recuperando pero na un ritmo bastante abao. Particularmente desempleo americano ta keda bastante halto. Tambe e desaroyonan riba tereno di produccion y consumo di petroleo na nivel mundial ta ser sigui cu cierto preocupacion. Na Europa, prijs di crudo Brent (Londres) tin algun tempo caba riba US$ 100 pa bari, mientras cu na New York actualmente prijs di crudo liviano (West Texas Intermediate) ta hopi mas abao na alrededor di US$ 85 pa motivo di inventario halto di crudo. Un aumento mas fuerte di prijs di petroleo ta ser considera un menaza pa recuperacion economico mundial na 2011.

Registracion segun distrito 201

Por observa cu e mayor parti di negoshi nobo ta lanta den e distritonan Oranjestad West y Oost y mas fuerte ainda na Noord, cual ultimo ta ilustra e crecimento comercial den e mallnan dilanti e hotelnan “high rise”. Hunto e tres distrito cu mayor desaroyo economico aki ta representa 68% di tur negoshi nobo. E restante 32% ta estableci na distrito Paradera, Santa Cruz, Savaneta y San Nicolas. San Nicolas te awor ta keda e parti di nos isla cu e desaroyo economico mas debil. E dos distritonan di San Nicolas (Noord y Zuid) hunto ta registra 103 empresa y cu esaki no ta yega na e cantidad di negoshi nobo estableci na Santa Cruz (116). E 103 empresanan aki ta representa solamente 9% di e total di 1160 negoshi nobo na 2010. Sin embargo por mira tambe cu San Nicolas hunto cu Santa Cruz ta e unico distritonan cu a mira un aumento, si compara e cifranan di 2010 cu 2007.

Registracion segun tipo di negoshi 201

Den e cuadro aki bao ta presenta un resumen di e ramanan di actividad economico cu mas ta inscribi. Por observa cu no a bin tanto cambio den e tipo di negoshi cu mas ta registra, cu ta construccion, restaurant, tienda di paña y zapato, take away, etc. Remarcable ta e crecimento den e ultimo añanan di oficina cu ta intermedia den venta y administracion di real estate, cu ta figura na di cinco lugar den e diez tipo di negoshi mas registra na 2010. Tambe por mira un crecimento fuerte den compania “holding” na di ocho lugar entre e dieznan aki, cual ta indica un tendencia di cierto structuracion entre empresanan liga na otro. Hunto e 521 empresanan aki ta representa casi 45% di tur negoshi registra (1160) na 2010

Registracion KvK di empresa nobo 2010; 10 categoria di actividad economico mas frecuente

Den un proximo presentacion di cifra di registracion lo inclui mas detaye di loke e datonan di registro comercial ta indica.

Aruba, 22 di februari 2011
Camara di Comercio y Industria (KvK)

ANEXO di Comunicado di Prensa no. 02 – 2011

 

By orbitalnets.com