11-2014 - Aruba Chamber Business Event 2014 - Encuesta empresarial di Prof. dr. de Vries ta cla

Oranjestad, 10 di april 2014 – Faltando solamente algun dia pa e gran evento di Camara di Comercio y Industria (KvK) “Transforming our business climate...taking charge of our future” tuma lugar, por anuncia cu e encuesta cu prof. dr. de Vries a haci entre empresarionan na Aruba a keda cla y ta mustra bon! Un danki grandi ta bay na e 220 empresario cu a reacciona dunando nan opinion tocante nos economia y kico por haci pa mehora e clima empresarial na Aruba. Cu e response aki sigur por papia di un base solido y valido den sentido cientifico pa carga e conclusionnan conteni den e rapport final di prof. De Vries.

E preguntanan den e encuesta tabata concentra rond di pasonan tuma den pasado recien pa mehora nos economia, tambe pasonan nobo actualmente den ehecucion, y posible incentivo cu ta ser aplica na otro pais cu nos por considera aplica aki tambe. Pa completa e survey, a pidi sugerencia liber di e encuestadonan mes pa mehoracion di nos clima empresarial.

Diamars anochi venidero dia 15 di april, pa 7:00 pm den Ballroom di Hyatt Regency, prof. dr. de Vries, dilanti un publico di invitado special y un bon representacion di nos empresanan local, lo revela e detayenan di e encuesta aki cu por indica camindanan nobo cu Aruba por tuma pa boost su clima di inversion.
Pa duna tur esnan un bista completo di e situacion economico di Aruba, presidente di KvK, sr. Omar Tromp lo duna e tradicional vision actual di KvK riba nos economia. E audiencia lo tin amplio tempo pa discuti cu ambos orador.

Tickets ta disponibel na KvK pa 100 florin pa persona. Compania y individuonan interesa por tuma contacto cu e departamento di secretariado na telefoon 582.1120 ext. 29/34/41 pa haci reservacion. Atende e evento aki pa asina abo tambe por ta parti di e transformacion di nos futuro!

Pa usuarionan di Facebook lo tin dos ticket gratis disponibel via un “like & share campaign”. Bishita nos Facebook-page: www.facebook.com/arubachamber


Aruba, 10 di april 2014
Camara di Comercio y Industria (KvK)