Connect to Us LinkedIn Youtube RSS

02-2014 - 2013: Aña cu resultado economico razonable
  • PDF
  • Print
  • Email

Oranjestad – Aña 2013 a resulta un aña cu un economia relativamente stabil, sigur si tuma na cuenta e reto despues di ciere di refinería Valero na 2012. Positivo ta cu sector di turismo a mantene cierto crecemento, loque a compensa parcialmente e perdida di actividad economico relaciona cu e refineria. Logicamente no tabata posible absorba tur e desempleo resultando di e ciere di refineria. Un indicacion di esaki ta un caida di alrededor di 2% den entrada di gobierno di loonbelasting te cu october 2013, compara cu e promer 10 luna di 2012, segun cifranan publica pa Banco Central. Apertura di hotel Ritz Carlton na fin di aña lo a trese cambio den desempleo tambe, aunque pa falta di cifra confiable di mercado laboral no tin un vista cla riba esaki ainda.

Pa loque ta e otro cifranan di entrada di gobierno cu ta duna un indicacion con economia ta actualmente, por constata cu entrada di BBO a mehora levemente compara cu 2012 – aumento di Afl. 0.9 miyon (1.2%) den promer 10 luna di 2013, mientras cu impuesto di importacion a duna un aumento considerable di 8.2% den e mesun periodo di 2013. Hunto cu un deflacion durante 2013, por bisa anto cu probablemente 2013 ta termina cu un Producto Interno Bruto Real (PIB, GDP) aumenta modestamente. Pa 2014 e inicio di varios proyecto grandi, entre otro e caminda grandi pa San Nicolas, expansion di hospital y e ringweg na Playa por trese bastante capital den circulacion, for di cual por spera un aumento di nos GDP pa 2014.

Registracion di empresa nobo
Cifranan di registro comercial na KvK pa aña 2013 ta indica un crecemento remarcable den registracion di negoshi nobo, compara cu cifra di aña 2012. Na 2013 a registra onshore un cantidad di 1324 empresa, mientras na 2012 esaki tabata 1197; un aumento di 10.6%. E aumento registra ta hiba nos pa promer biaha desde e crisis global di 2008/2009 na cifra di registracion riba 1300 pa aña. Mester señala sí cu e cambio drastico aki a tuma lugar mayoritariamente den categoria di negoshi chikito individual (“eenmanszaak”), cu a crece di 675 registracion na 2012 te na 833 na 2013, un aumento di 23.4%.

Di otro banda mester señala cu e cantidad registra di empresa mas formal ( NV, VBA y AVV) a cay considerablemente den e mesun periodo aki. Mientras na 2012 a registra ainda 500 NV, AVV y VBA nobo, na 2013 esaki tabata solamente 454, loque ta representa un caida di 9.2%. Ta importante señala cu den VBA tabatin un aumento fuerte di 23.5% (168 na 2013; 136 na 2012). Un indicacion cu e VBA ta reemplazando mas y mas e NV como forma legal preferí.

Pa loque ta e desaroyo di empresa nobo segun lugar di establecimiento, por observa cu den e distritonan Noord, Oranjestad Oost, Paradera, San Nicolas Noord, Savaneta y Santa Cruz tabatin un aumento di negoshi nobo registra. Den Oranjestad West y San Nicolas Zuid tabatin menos empresa nobo inscribi na 2013 compara cu e aña anterior. E crecemento mayor a tuma lugar na Paradera, cu 29.4%. E caida mayor a keda registra na San Nicolas Zuid (-9.5%) hustamente e area central comercial di San Nicolas.

Aparentemente ta tempran ainda pa mira efecto di e regimen fiscal special institui pa e region di San Nicolas na 2013. Di otro banda, e areanan Savaneta y San Nicolas Noord, considera tambe parti di e area beneficia den e zona special aki, si a conoce un aumento di negoshi nobo.

En general e aumento di e cantidad di negoshi registra ta un bon señal, cu por indica cu en todo caso nos economia ta mantene su mes na un cierto nivel, a pesar cu e perdida di refineria di Valero. Un reto ta keda e hecho cu e sector petrolero no ta genera asina tanto divisa mas, mientras di otro banda e nivel di consumo di producto petrolero (gasolin, diesel, fuel oil, e.o) ta keda halto y mester compensa e desbalance aki cu divisa di otro sector pa paga e importacion aki.

Finanza publico
Banda di un perspectiva economico general razonable pa 2014, situacion financiero di gobierno ta sigui un preocupacion mayor, tambe pa motibo di e consecuencianan cu esaki por tin pa nos economia, entre otro den medida cu por aumenta “cost of doing business”. Segun cifranan proporciona pa Departamento di Finanzas durante Dialogo Social na fin di 2013, gastonan total di gobierno na 2013 no lo a baha compara cu 2012, incluyendo un aumento drastico den gastonan di personal (di Afl. 685 miyon na 2012 pa Afl. 723 miyon na 2013, un aumento di 5.5%. ). Gastonan total di gobierno pa 2013 ta proyecta pa yega Afl. 1437 miyon, mientras cu entrada total ta yega solamente Afl. 1164 miyon, lagando asina un deficit considerable cu a ser cubri cu prestamonan nobo. Pa fin di 2013 e relacion entre debe publico y GDP lo ta entre 73 y 74%, loque ta trese nos claramente den zona di peligro. E introduccion di un limite di gasto pa 2014 di Afl. 1350 miyon ta di aplaudi, pero mester observa cu pa logra esey so caba ta exigi corta gasto for di e nivel actual pa yega na e plafond aki. Ta di spera cu confianza den economia no keda afecta pa e problemanan financiero na nivel di gobierno y cu lo por cuminsa traha conhuntamente riba con pa crea un clima mas atractivo pa inversion na Aruba, tanto pa inversionista local como di exterior.

Aruba, 09 di januari 2014
Camara di Comercio y Industria (KvK)

Attachment - Press release 02-2014

 

By orbitalnets.com