Connect to Us LinkedIn Youtube RSS

08-2013 - KvK: Reaccion riba informe Preliminar IMF
  • PDF
  • Print
  • Email

Oranjestad – Despues cu Camara di Comercio y Industria (KvK) tabatin e oportunidad di reuni cu e delegacion di IMF cu a bishita Aruba pa nan Mision Consultativo, a tuma nota tambe di nan informe preliminar di dia 25 di april ultimo. A peticion di varios medio di prensa cu a acerca KvK pa un promer reaccion, KvK ta publica e siguiente comentario.

Manera semper, IMF a duna un promer impresion di loque ta bay ta nan informe final, di un manera balanza y cauteloso. Asina IMF ta reconoce e esfuerzonan haci pa contene e consecuencianan di dos crisis cu a toca Aruba, e crisis global financiero di 2008/2009 y e cierre di refinería di Valero. Mientras ta observa un progreso economico gradual, ainda Aruba ta na un nivel di 12% mas abao compara cu promer cu e crisis di 2008. “Aruba ta enfrenta e desafio di reconstrui su espacio fiscal sin perhudica un recuperacion relativamente debil. Deficit fiscal ta proyecta pa baha na 2013, y un tarea gigantesco ta keda pa haci. Sigura un recuperacion continuo lo requeri mantene competividad atraves di diversificacion di mercado turístico y manteniendo crecemento di salario den línea cu desaroyo di productividad,” asina e rapport ta indica den su introduccion.

IMF ta constata cu desempleo a mengua considerablemente desde 2009, sin embargo el a keda halto ainda na 9,5% pa fin di 2012, pa motibo di e cierre di refineria. Pa 2013, IMF ta spera un crecemento economico di algo mas cu 2%, a base di un turismo robusto y mehor poder di compra pa motibo di prijs di awa y electricidad mas favorable. Sin embargo, cierre di refinería a crea un bashi den inversion priva dificil pa yena y por lo tanto nos Producto Interno Bruto (GDP) lo yega su nivel di promer cu crisis di 2008, te na 2018.
IMF ta constata tambe cu “consolidacion fiscal ambicioso ta necesario pa reconstrui espacio pa maneho fiscal.” A pesar di e medidanan tuma, Aruba su posicion fiscal a deteriora fuertemente desde 2008. Pa 2012 ta constata un deficit gubernamental di 8,5% di GDP. Reforma a tuma lugar pa contene gastonan relaciona cu pension y cuido medico atraves di Dialogo Social, aunque e medidanan aki no a resulta suficiente pa contene e crecemento rapido di e deficit, loque tabata un resultado combina di reduccion di BBO te 1,5%, y aumento di gasto di personal (parcialmente causa pa pagonan atrasa) y gastonan aumenta di bienes y servicio.

E delegacion ta mira un reduccion di deficit (presupuestario) como un tarea urgente y ta di opinion cu reduccion te na 6% di GDP por ta realizable pa 2013. Gobierno tabatin pensa pa corta deficit te 4,6% na 2013 segun su proyeccion te cu 2016. Pa logra contene na 6%, IMF ta recomenda resisti posible presion pa aumenta gasto den aña di eleccion.

A mediano plazo, segun IMF, gobierno lo mester di medida adicional pa yega na consolida su posicion fiscal. “Sin medida adicional, gobierno su deficit fiscal lo keda halto a mediano plazo, coriendo riesgo cu debe publico ta alcanza nivelnan insostenible.” Como menaza serio ta mira e deficit di AOV den e añanan venidero cu gobierno mester bay cubri, y e pago pa e proyectonan PPP (Public Private Partnership), cualnan ya pa aña 2014 por cuminza aumenta e deficit. Pa evita cu responsabilidadnan financiero di AOV y PPP no bay añadi mas presion, ta recomenda mas reforma di pension y pa pone un limite na gastonan relaciona cu PPP. Pa loque ta AOV, ta pendiente ainda e debate tocante aumento di edad di pension, cu na parecer di KvK ta birando inevitable, ya cu aumenta prima di AOV no ta mustra un bon opcion tampoco.

IMF ta mira tanto aumento di entrada como cortamento di gasto necesario pa por yega na consolida posicion financiero di gobierno. E plan di gobierno pa yega na un “balanced budget” na 2016, mayoritariamente atraves di baha gasto, ta ser mira como algo positivo. Como cu gasto di personal ta e ítem mas grandi riba presupuesto di gobierno, lo ta logico cu mayoria di e peso di ahustacion lo bin den e categoria aki. Pa aumenta entrada ta recomenda specificamente introduccion di un Value Added Tax (VAT, BTW), algo cu Camara di Comercio ta favorece pa hopi aña caba. Esaki lo bay acompaña cu e desaparicion di BBO, si e keda implementa.

En cuanto e perspectiva pa un recuperacion continuo, lo ta necesario continua esfuerzo pa yega na diversificacion di nos economia y mantene competitividad. Pa un economia mara na moneda externo (US Dollar) mantene competitividad lo significa tambe contene crecemento di salario, particularmente en vista di Aruba su productividad laboral cu ta bahando, y mester aumenta flexibilidad di mercado laboral.

Finalmente, IMF ta apoya desaroyo di sector di energia renovable, pero cu cuidao den su financiamento. Mirando e tendencia demografico adverso (vergrijzing y scarcedad laboral), e caminda correcto lo ta un pilar nobo economico orienta riba capital y tecnologia, y basa riba recurso natural disponible. Ta recomenda pa haci esaki a traves di financiamento directo extranhero pa mantene sostenibilidad externo di Aruba, es decir pa no sigui deteriora e posicion financiero gubernamental.

Como conclusion KvK ta desea di añadi lo siguiente:
- IMF ta mira e tempo nos dilanti como dificil, cu un crecemento economico modera, cual lo no percura pa aumento grandi di entrada pa gobierno;
- No ta recomendable sigui riba e nivel halto di deficit presupuestario cu mester financia externamente;
- Logra un “balanced budget” lo mester bin especialmente di bahamento di gasto, cual necesariamente lo mester bin principalmente di corta gasto di aparato gubernamental, especificamente di personal;
- Pa evita aumento di deficit den futuro, mester contene e responsabilidadnan financiero relaciona cu e.o. AOV y PPP;
- Recomendacion di considera introduccion di un BTW (VAT, IVA) lo mester ta den cuadro di un revision profundo di nos regimen fiscal, algo cu KvK ta proponiendo pa varios aña.

Aruba, 03 di mei 2013
Camara di Comercio y Industria (KvK)

 

By orbitalnets.com