Connect to Us LinkedIn Youtube RSS

07-2013 - KvK: Envehecimento problema pa Hoben?
  • PDF
  • Print
  • Email

Oranjestad – Ora discuti e fenomeno di envehecimento, hopi biaha ta existi e impresion cu esey ta un problema pa hende di edad avanza. E generacion Y, hendenan hoben, ta pensa cu pension ta hopi aña leu ainda. Puntra nan y nan contesta ta cu nan no a ni cuminsa pensa riba pension. Hopi tin debe di estudio, auto of gastonan halto di vivienda pa paga. Simplemente nan ta di opinion cu nan no tin espacio pa paga pension.
Reality check: si bo tin 25 aña, berdad bo pension ta hopi aña leu pero ta importante pa bo cuminsa planea con bo ta bai paga pa bo pension. Chance ta grandi cu haya suficiente pension no ta bai sucede di mes mas aki tanto aña, ora abo ta bai baha cu pension.

Pension manera nos conoce awe
Ban cuminsa cu e mal noticia prome. E fondo di AOV ta practicamente bashi. Esey kiermen cu abo, como un adulto hoben entre 25-35 aña, lo tin cu contribui hopi mas sea na prima di AOV, of na impuesto, pa por paga e pensionnan den futuro. Tene na cuenta cu e poblacion di 60+ a aumenta entre 1960-2010 cu 675%, y ta sigui crece, di 17 mil awe pa 37 mil na 2030. Realisa cu ta bo contribucion awe ta pagando e pension di awe. Ademas no ta sigur cu ora abo mes yega edad di pension, cu lo ta talvez na edad di 65 aña of mas, cu e AOV lo ta existi den su forma actual ainda.

Plan di pension
Awor por ta bo ta pensando:“pero mi ta trahando ariba mi plan di pension caba. Mi doño di trabao pa e seguro obligatorio ta kitando 2% tur luna for di mi salario plus e mes tambe ta pagando 2%.” Hopi bon, pero tene cuenta cu esaki ta un suma minimo y cu ta necesario pa aumenta e suma cu algo cu ta permiti bo un bida comodo pa aki por ehemplo 30 aña, despues cu bo baha cu pension.

Tene cuenta cu tur e avance medico cu nos tin awendia, nos ta biba mas largo pero nos pension no ta aumenta di mes. Esey kiermeen cu si mi ta spaar por ehemplo 200.000 florin pa mi pension, mi mester por rek e suma aki pa un periodo di 20-30 aña. Esey ta basa ariba cifras di awendia, cu tecnologia semper avanzando, con largo bo ta kere di lo biba despues di haci 65 aña?

Mas liher bo cuminsa spaar, mihor!
E bon noticia ta cu si bo tin 25 aña of ta mas jong, bo tin hopi tempo pa spaar. Si bo cuminsa cu djis un suma chikito di por ehempel 50 florin pa luna, bo ta spaar hopi mas cu si bo cuminsa despues di bo 35 aña di edad.

Converti un crisis un oportunidad
Pero djis pasobra e futuro di fondo di pension ta den crisis, no kiermen cu bo futuro tambe ta den crisis. Cada crisis ta trece oportunidad. E gran cantidad di hende 60+ cu ta bayendo cu pension ta trece hopi oportunidad empresarial pa hende jong cu tin full un carera profesional nan dilanti. Inverti den un negoshi y cu e business planning correcto, determinacion y bon vision, bo futuro sigur por ta uno exitoso!

Na Merca, aparatonan pa evita catastrofe despues di accidente, manera ora hendenan grandi cai, ya ta considera “the old business of old age”. Awendia negoshinan cu ta dirigi na esnan 60+ ta focus mas ariba producto y servicionan cu ta promove bienestar, mobilidad, autonomia y conectividad social.

No lubida ariba e hecho cu hopi hende 60+ ta scoge pa biba den nan propio cas. Esey ta trece cu ne cu casnan tin cu wordo adapta na e persona di edad halto. Of nan mester cuido personalisa, cual tambe ta trece oportunidad empresarial.

Haya sa mas riba 25 di Maart proximo
Con bo ta prepara pa e impacto cu enbehecimento di e poblacion lo bai tin ariba bo futuro? Bo ta percura pa bo ta bon informa! Camara di Comercio, hunto cu ATIA, MAMBO, SNBA y AHATA ta organisando algun sesion tocante e tema di envehecimento y su consecuencia, di cual e siguiente lo tuma lugar riba dialuna, 25 di Maart na Centro Deportivo Tanki Leendert, cuminsando 7:00 di anochi.

Oradornan lo ta Martijn Balkestein, director di Central Bureau van de Statistiek (CBS) kende lo conta con e situacion actual ta na Aruba y kico ta e prognostico di CBS entre awe y aña 2030. Despues Frank Snijders, specialista financiero, lo elabora mas ariba e beneficio di tin un pension ya na un edad hoben y e retonan pa fondo di AOV.

Centro Kibrahacha y Fundacion Movemento ta Bida lo ta presente tambe pa comparti informacion y tips con hiba un estilo di bida saludable na edad halto.

Haya sa mas tocante enbehecimento na Aruba pa asina hunto nos yega na solucionnan y traha awor riba un futuro sigur! Tuma contacto cu KvK pa reservacion, na 582.1566, ext. 27, 35, 42; This e-mail address is being protected from spambots. You need JavaScript enabled to view it of www.facebook.com/arubachamber.


Aruba, 21 di maart 2013
Camara di Comercio y Industria (KvK)

 

By orbitalnets.com