Connect to Us LinkedIn Youtube RSS

06-2013 - Continuacion di KvK: Aruba without the refinery...planning creates opportunities!
  • PDF
  • Print
  • Email

Oranjestad - Na mei 2012, durante e ultimo Annual Business Dinner Meeting di Camara di Comercio y Industria (KvK) a elabora riba e tema di futuro di Aruba sin un refineria. Un tema cu na e momento ey a causa bastante discusion, ya cu hopi hende tabata pensa cu e refineria lo tabatin un futuro ainda. Nos ta casi un aña mas leu y e perspectivanan pa continuacion di e refineria ta practicamente no existente. Mas cu aña pasa, ta bira urgente pa debati y discuti riba un futuro pa Aruba sin un refinería.

A peticion di hopi persona cu a keda pendiente pa un continuacion di e debate cu a cuminza aña pasa, dia 26 di maart venidero, lo tuma lugar na Renaissance Convention Center un mainta di informacion y debate riba e futuro di e tereno di refineria y mas en general, di San Nicolas. E tema lo ta: “Aruba without the refinery; planning creates opportunities”. Sala ta habri desde 8:30 y e evento lo dura di 9:00 di mainta te 12:00 or.
Nos ta papiando di e aproximadamente 4 kilometer di costa mas importante pa Aruba su futuro economico. For di e facilidadnan di transshipment na Zeewijk (”Wickland”) te na Colony, nos ta contempla un tereno grandi cu facilidad portuario excelente cu por sirbi varios meta economico na mes momento.
Desde aña pasa caba por ehemplo, KvK a vocifera e opinion cu e haf nobo di container lo ta mihor situa na San Nicolas cu na Barcadera, mirando futuro desaroyo den ramo di transporte internacional di container y e limitacionnan tecnico di Barcadera.
Ademas haf di San Nicolas ta asina extenso cu diferente otro actividad portuario lo por haya un lugar aki, logrando asina yega na un diversificacion optimal. Durante e evento aki varios posibilidad lo ser introduci y discuti.
Logicamente lo dedica atencion tambe na San Nicolas den su totalidad, especialmente e centro comercial cu ta keda inmediatamente banda di e refineria.
KvK a invita varios orador, cu cada un di un diferente angulo lo ilustra e posibilidadnan di un desaroyo economico diferente cu lo por aporta na un renacemento economico pa San Nicolas.

Como orador lo ta presente:

- Sr. Vernon Huerta (Ernst & Young): Lo elabora riba resultado di investigacion di E&Y tocante diferente sector cu Aruba por desaroya den futuro
- Sr. Patrick Newton (KPMG): posibilidad di desaroya “green technology” den area di san Nicoas
- Sr. Michael-Leo van Romondt (Deloitte) lo elabora riba posibilidad di un zona di incentivo special pa San Nicolas
- Sr. Daniel Brete, studiante di Universidad di Liverpool lo presenta su tesis di graduacion den cual ta presenta e aspecto y posibilidadnan tecnico di e area portuario di San Nicolas
- Sr. Jamal Mahawat Khan, presidente di KvK lo presenta un iniciativa di Aruba mes pa yega na desaroyo di actividad economico diverso riba tereno di e refineria.

Moderador durante e evento lo ta Sr. Ryan Maduro, manager di educacion na seccion Hospitality & Tourism di EPI y consultant den desaroyo organizativo.
Ta importante menciona cu despues di e diferente presentacionnan, lo tin amplio tempo pa e sala discuti cu e panelistanan, ya cu e meta ta pa esnan cu kier aporta cu nan ideanan por haya e oportunidad pa trese esaki dilanti. Un invitacion na un y tur cu ta desea di bin scucha y/o contribui na e debate aki asina importante pa futuro di San Nicolas y Aruba, pa registra mas pronto posible.
Participacion na e evento ta gratis, pero ta necesario pa registra di antemano, via e-mail dirigi na This e-mail address is being protected from spambots. You need JavaScript enabled to view it of yamando KvK na telefon 5821566, ext. 27, 30, 35 of 42. Mas informacion lo aparece tambe riba nos website: www.arubachamber.com


Aruba, 19 di maart 2013
Camara di Comercio y Industria (KvK)

 

By orbitalnets.com