Connect to Us LinkedIn Youtube RSS

19-2012 - Gremionan empresarial cu serie di nochi informativo tocante enbehecimento di poblacion
  • PDF
  • Print
  • Email

Oranjestad – Entrante januari 2013, Camara di Comercio (KvK), hunto cu ATIA, San Nicolas Business Association y Mambo, lo organisa cinco sesion pa informa pueblo di Aruba tocante enbehecimento ("vergrijzing") di nos poblacion. E iniciativa aki ta resultado di Dialogo Social unda a yega na acuerdo tocante e "flexpensioen" y e seguro di pension obligatorio pa sector priva, como medida pa contra-aresta e tendencianan negativo pa entre otro fondo di AOV, cu ta sufri di gastonan aumenta a causa di e cantidad creciente di hende di edad halto cu ta cobra AOV. Consciente cu e medidanan aki a lo largo lo no ta suficiente pa resolve e problema completo, a yega na acuerdo pa duna mas informacion tocante e proceso di enbehecimento y su diferente consecuencianan pa nos comunidad.

E proceso di enbehecimento di nos poblacion ta sucediendo hopi mas rapido compara cu otro pais. Den solamente 50 aña , entre 1960 y 2010, e cantidad di persona di edad 60+ a crece cu 675%. E crecemento grandi aki lo continua sigur te despues di aña 2030 ora cu nos lo tin alrededor di 36 mil persona riba 60 aña , mientras awor tin como 17 mil. Na mes momento nos ta mira tambe un caida grandi den e cantidad di nacemento, tanto absoluto como relativo ("ontgroening") cu ta aumenta gravedad di e proceso aki.

Consecuencia di enbehecimento di nos pais
E consecuencianan di e proceso aki unda cada vez e poblacion di edad halto ta aumentando ta grandi y varios. Por ehemplo pa nos forza laboral unda na cierto momento lo tin mas hende ta saliendo for di nos mercado laboral cu ta drentando, pa motibo cu tin tambe menos hoben disponible pa traha. Como resultado, Aruba por ta bay ta importando cada vez mas trahador di extranhero. Tambe enbehecimento ta trece cu ne cu nos fondo di pension general (AOV) ta birando insostenible y ta kedando sin reserva na aña 2014 caba, y esey ta causa cu gobierno lo mester financia deficit di e fondo di AOV for di su presupuesto.

Gasto di cuido medico tambe lo aumenta drasticamente, ya cu personanan grandi ta requeri mas cuido medico compara cu personanan mas hoben. E consecuencia ta cu e trahador lo tin cu aporta mucho mas di su salario na AZV pa por keda carga e gastonan. Caso contrario, den futuro AZV por ta obliga pa corta mas den su pakete di servicio, unda e por reduci mas ainda e cantidad di remedi y tratamento medico cu ta cubri.

Un otro consecuencia ta e gastonan di cuido pa personanan di edad halto cu no por biba riba nan mes mas y esaki por tin consecuencia tambe pa composicion di famia, unda mayornan grandi lo por haci un apelacion riba nan yiu(nan) si no tin suficiente capacidad institucional pa cuido di anciano. Con ta bay organiza tur esey, ta un reto grandi pa nos comunidad cu apenas nos a cuminza pensa riba.

Meta di sesion
Meta di e sesionnan ta pa comparti informacion corecto, obhetivo y amplio tocante e topico. A logra haya Martijn Balkestein, director di Centraal Bureau voor de Statistiek (CBS) dispuesto di conta con e situacion actual demografico ta na Aruba y kico ta e prognostica di CBS si nada cambia. Despues Frank Snijders, specialista financiero y ex-miembro di directiva di ATIA, lo elabora mas ariba e parti di nos sistema di pension den su diferente formanan. Tur presente lo haya e oportunidad pa comparti opinion y trece nan idea y preocupacion dilanti. Esaki ta un oportunidad pa un y tur forma parti di e solucion di kico ta mihor pa nos comunidad.

Fecha y Iugar
Ta invita tur hende pa atende e sesionnan informativo, cu lo tuma Iugar ariba e siguiente fechanan, cuminsando 7:30 di anochi:
Dialuna, 28 di Januari, 2013 na Camara di Comercio na Oranjestad
Dialuna, 25 di Februari, 2013 na YMCA San Nicolas
Dialuna, 25 di Maart, 2013 na Noord
Dialuna, 22 di April, 2013 na Savaneta
Dialuna, 27 di Mei, 2013 na Santa Cruz
Dialuna, 24 di Juni, 2013 na oficina di ATIA na Oranjestad 

Informacion
Na KvK y riba nos website por haya un flyer informativo tocante e sesionnan. Si tin cualkier pregunta of sugerencia, favor di tuma contacto cu KvK libremente, cu e departamento Business Information & Support, na tel. 582.1566 of This e-mail address is being protected from spambots. You need JavaScript enabled to view it


Aruba, 17 di december 2012
Camara di Comercio y Industria (KvK)

 

By orbitalnets.com