Connect to Us LinkedIn Youtube RSS

10-2012 - KvK Registracion di Empresa Jan - Juni 2012
  • PDF
  • Print
  • Email

Oranjestad – Registracion di empresa nobo na Registro Comercial di Camara di Comercio y Industria te cu luna di juni 2012 ta mustra un reduccion compara cu e promer seis luna di 2011. Na 2011 tabatin un total di 586 empresa nobo inscribi. E aña aki sin embargo a registra un total di 558 empresa nobo “onshore” y “offshore” entre januari y juni, loque ta significa un reduccion di 4.8% compara cu e mesun periodo di 2011.

Registracion pa luna Jan-Jun 2011 – 2012

alt

alt

Si tuma e cifranan di empresa “onshore” so, por observa cu tabatin 545 registracion, mientras cu aña pasa esaki tabata 574 empresa registra den e mesun periodo, un bahada di 5%. Por señala sí un mehoracion compara cu aña 2009, unda a registra den mesun periodo solamente 444 empresa onshore, cual tabata e punto mas abao den registracion den añanan reciente. E reduccion a tuma lugar principalmente den e categoria di “eenmanszaak”, cu a bay di 370 aña pasa pa solamente 311 e aña aki. Esaki ta representa un decrecimento di 15.9%.
Pa empresanan cu tin personeria huridico (NV, VBA, AVV), por mira cu en total e cantidad registra a aumenta considerablemente, 182 na 2011 y 222 na 2012, un aumento di 22%. Por nota un aumento significante di e cantidad di VBA, e forma legal nobo di empresa introduci na 2009 cu awor ta hayando mas y mas interes di parti di e empresario. Den e periodo referi e cantidad di VBA registra a bay di 7 na 2011 pa 49 e aña aki, un aumento di 600%. Esaki a mas cu compensa e bahada chiquito cu tabatin den cantidad di NV registra (175 na 2011 y 171 na 2012).
E sector “offshore” den e periodo analisa no ta mustra tanto cambio, den promer mitar di 2011 a registra 6 compania offshore y na 2012 te awor 13 den e periodo di januari pa mei. Di otro banda, e cancelacion di empresa “offshore”, mayoria di nan AVV, ta sigui su rumbo; en total 72 empresa a cancela registracion na 2012, compara cu 53 na 2011 den mesun periodo. Esaki ta indicacion cu e sector offshore no a cambia su rumbo negativo y ta sigui bira cada dia mas chiquito. Pa fin di juni 2012 tabatin ainda registra como empresa activo offshore 1396, di cual 228 ta NV. Pa mas detaye por mira e estadisticanan den e anexo cu ta acompaña e relato aki.

E cifranan menciona ta indica un tendencia di cautela cerca e empresario chiquito pa lanta negoshi nobo, mientras cu na nivel di empresa mas formal, esnan cu ta bay pa un NV of VBA mas tanto, por mira cu e disposicion pa lanta empresa den e categorianan aki a aumenta.
Pa por tin un vista mas completo riba con nos economia ta moviendo, ta importante pa inclui otro parametro economico. Asina por tuma nota di e cifranan publica pa Banco Central ta indica un crecemento di 7.9% di entrada total pa gobierno den promer cuatro luna di 2012, compara cu 2011. Den e periodo aki, entrada total di impuesto a subi cu 6.9%, mientras cu BBO ta mustra un incremento di 2.3%. Impuesto di importacion a subi cu 1.5%, mientras cu di otro banda, e categoria di impuesto di importacion y accijnzen hunto a subi cu 12.1%. Impuesto riba salario a keda na mesun nivel.
Por conclui cu en general e cifranan pa promer cuatro luna di 2012 ta indica un crecemento economico modera, aunque cu esaki no ta refleha den e cifranan di registracion di empresa nobo na KvK.

Economia internacional
Curso di economia di Aruba pa segundo mitar di 2012 ta depende principalmente di desaroyo di economia internacional y mas exacto e situacion na Europa, unda incertidumbre tocante un solucion pa e paisnan den problema, Grecia, Spaña y Italia, ta afectando economia Europeo. Na su turno esaki ta afecta otro parti importante di economia global, entre nan China, India y Estadonan Uni. Desempleo na e ultimo aki ta mustrando un situacion unda e crecemento economico modera ta crea empleo nobo, pero no suficiente pa baha e cifra di desempleo cu awor ta na 8,3%. Pa promer tres luna di 2012 crecemento di GDP Americano tabata na 2%, mientras cu den segundo cuartal esaki a baha te 1,5% y ta spera cu pa e lunanan na caminda esaki lo no cambia tanto. Prijs di petroleo riba mercado internacional ta reflehando e expectativanan negativo aki, cu prijs di West Texas Intermediate cu a baha te banda di US$ 80 na New York y Brent na Londres te banda di US$ 90 pa bari, pa bolbe cuminza subi atrobe den direccion di riba US$ 95 na New York y riba US$ 115 na Londres, loque ta trese prijs di crudo atrobe na un nivel cu por afecta negativamente crecimiento economico.


Aruba, 29 di augustus 2012
Camara di Comercio y Industria (KvK)

Anexo di KvK press release no. 10-2012

alt

alt

alt

 

By orbitalnets.com