Connect to Us LinkedIn Youtube RSS

15-2012 - KvK a inaugura exhibicion di fotografia Bida Marino di Aruba
  • PDF
  • Print
  • Email

Oranjestad – Diahuebs, 12 di juli a tuma lugar e inauguracion di un exhibicion nobo na Camara di Comercio. Ta trata di un expo di fotografia saca bao awa na Aruba, yama Bida Marino di Aruba. E potretnan presenta den e expo ta di e fotografo Dimphy Janssen y nan ta exhibi na edificio di Camara di Comercio, unda publico henter ta bonbini pa bin admira su coleccion.

Camara di Comercio ta contento di por colabora cu artistanan den e forma aki. Banda di su tarea di apoya comercio local, kier duna un aporte tambe na arte local y considerando cu e portretnan ta forma parti di nos bida maritimo, cu ta un parti di nos isla cu hopi hende no por admira, Camara di Comercio cu placer ta trece e bida marino mas serca di por medio di e exposicion.

Fotografo Dimphy Janssen tabata un scuba diving instructor pa varios aña na Aruba. Dimphy a keda impresiona cu e bunitesa di e bida marino rond di Aruba, y a conduci na su iniciativa pa desaroya su habilidadnan den e arte aki. Como cu proximamente e ta bandona Aruba pa regresa su pais natal Hulanda, e tabata desea di comparti cu publico loke el a logra produci te awor, cu ta duna un impresion bunita di un parti di nos naturaleza cu nos no ta mira tur dia.
Saca potret bao awa conoce tambe varios reto, un di nan ta pa haya e combinacion di lus perfecto y otro ta pa capta e color manera e ta suppose di ta. Tur esaki ta haci fotografia bao awa un arte apart, uno cu ta sumamente interesante y bunita pa admira.

E potretnan lo keda exhibi na KvK pa seis luna. Despues lo acerca un otro artista pa exhibi su arte den e area di recepcion na KvK. Fotografo of pintornan cu interes pa demonstra nan obranan na KvK, por tuma contacto libremente cu Sonja Velthuizen na 582.1566, ext. 42.
Pa medio di esaki, Camara di Comercio kier invita tur hende pa bin admira e potretnan bunita di Sra. Dimphy Janssen na nos edificio, durante nos orario di oficina, di dialuna pa diabierna, di 8:00 pa 16:30.


Aruba, 13 juli 2012
Camara di Comercio y Industria (KvK)

  

 

By orbitalnets.com