Connect to Us LinkedIn Youtube RSS

14-2012 - KvK cu exitoso Plaza di Informacion di Negoshi
  • PDF
  • Print
  • Email

Oranjestad – Diasabra ultimo dia 7 di juli Camara di Comercio (KvK) a tene su prome edicion di Business Plaza, Get Started. Caribbean Mercantile Bank (CMB) a sponsor e evento aki cu a sa di atrae hopi interesado.

E plaza di informacion tabata bon bishita unda e interesadonan por a topa cu compania manera CMB, Ennia, Ecury Logistics, Free Zone Aruba N.V. y instancia manera Departamento di Salubridad Publico, Idea (seccion informativo pa empresa di Departamento di Asunto Economico). Aki tabatin tur informacion disponible, ariba tur tipo di tereno pa tur empresario nobato encontra locual e tin mester pa yude den realisacion di su soño y con pa maneha e negoshi den e fase di inicio.

Durante e evento tur presente tabatin oportunidad pa combersa y netwerk cu profesionalnan presente, cu a duna tips valioso pa nan start nan negoshi. Esaki a tuma lugar den e auditorio por medio di presentacionnan. E apertura oficial a ser haci cu palabranan di Presidente di KvK, sr. Jamal Mahawat Khan. Despues di e palabranan di sr. Khan, Camara di Comercio mes a sigui cu e presentacion, con pa lanta bo negoshi, presenta pa sra. Sonja Velthuizen y sra. Roxanne Wolff. Seguidamente sra. Lindsey Wever di CMB a comparti informacion interesante con pa haci negoshi cu banco, unda esnan presente a haya sa kico pa haci pa bin na remarca pa haya prestamo di banco pa nan negoshi.

E presentacion cu a hala hopi atencion tabata esun di e hoben sr. Kawish Misier cu a conta su experiencia como empresario hoben y inovativo. E hoben aki cu ta studiando tambe na Universidad di Aruba di apenas 22 aña a dicidi di lanta su compania Eco Power Cleaning tres aña pasa pa asina cuminsa experiencia kico ta ser un empresario. Sr. Federico Fingal di VCC International tambe a duna un presentacion tocante programa di payroll. Pa e topico di marketing y social media sr. Patrick Melchiors di The Marketing Department a sa di conta bishitantenan e ultimo desaroyo ariba ambos tereno; Sr. Merrill Robles di Exper N.V. a duna un presentacion cu varios tips tocante seleccion di personal adecua pa bo negoshi. Por ultimo e parti legal di tin un negoshi, specificamente e diferencianan entre varios tipo di compania, a ser cubri pa sra. Milly Schwengle di HBN Law.

Tambe tabatin dos otro seccion di informacion cu a ser duna den grupo mas chikito. Uno hopi importante tabata e parti di skirbi un business plan pa bo negoshi duna door di Price Waterhouse Coopers. Bishitantenan por a haya tambe splicacion tocante e contenido di un relato anual di compania, y e parti di yena papel di belasting door di compania di administracion financiero CATC. Ambos compania a contribui na duna informacion hopi importante na e bishitante, pa cual KvK kier a gradici ambos pa e cooperacion.

KvK kier a gradici tur esnan cu a duna un presentacion y cu a colabora cu duna informacion bao di tent na e parti pafor di edificio pa asina por a haci di e Business Plaza Get Started uno exitoso.
Especialmente un palabra di gradicimento na CMB cu a apoya financieramente e evento aki, cu ta na bienestar general di e progreso di Aruba su economia. Tambe tur persona cu a bishita e Business Plaza Get started, danki pa acudi na e iniciativa aki di KvK cu tin como meta haci informacion di negoshi mas accesible pa publico en general.

Tur esnan interesa den e presentacionnan di e Business Plaza por bishita nos website www.arubachamber.com. Pa mas informacion por tuma contacto cu This e-mail address is being protected from spambots. You need JavaScript enabled to view it of yama nos na 582.1566, ext. 27/35/42.


Aruba, 13 di juli, 2012
Camara di Comercio y Industria (KvK)

  

  

 

By orbitalnets.com