Connect to Us LinkedIn Youtube RSS

11-2012 - KvK: Reaccion riba Xiomara Ruiz
  • PDF
  • Print
  • Email

Oranjestad – Camara di Comercio y Industria (KvK) a tuma nota di e comentario di parlamentaria Xiomara Ruiz Maduro riba e encuentro cu KvK tabatin siman pasa cu comision financiero-economico di Staten. E reunion aki tabata pa comparti informacion tocante situacion economico y financiero di nos pais. Den esaki KvK simplemente ta vocifera su opinion neutral y balansa, forma como institucion independiente, sea cu esaki ta cuadra of no cu opinion di cualquier di e fraccionnan politico presente. Semper pues lo por tin punto di concordancia of di disputa cu algun di e representantenan di pueblo.

Den e reunion menciona a trata un serie di asunto dunando un vista integral di nos situacion socio-economico, di e situacion en cuanto e refineria di Valero, te na e perspectivanan encuanto “vergrijzing” y su consecuencianan pa futuro di pension, sistema di cuido medico, cuido pa anciano y pa mercado laboral. Ta di lamenta cu sra. Ruiz ta scoge solamente e tema di finanzas di gobierno como unico aspecto pa su comentario, dunando e impresion cu esey so a ser discuti.

E tema di situacion financiero di gobierno pa hopi aña caba ta pertenece na e topiconan standard den cada encuentro di e tipo aki di KvK cu cualquier instancia. E situacion financiero cu KvK ta señala como preocupante no ta cos reciente so, pero a ser tresi dilanti na varios ocasion, entre otro den varios Annual Business Dinner di KvK, y tambe na fin di aña den evaluacion di henter aña. Como punto central di preocupacion ta figura e asunto di un payroll insostenible, loque ta exigi un contesta contundente, no di e institucionnan manera KvK, sino di e representantenan di pueblo den parlamento.
KvK ta spera cu por a contribui na un debate sano y madura riba e tema aki den nos parlamento.

Camara di Comercio y Industria
26 di juni 2012

 

By orbitalnets.com