Connect to Us LinkedIn Youtube RSS

05 - 2012 - Camara di Comercio: Registracion di Negoshi na 2011
  • PDF
  • Print
  • Email

Oranjestad - Aña 2011 ta duna, pa loke ta registracion di empresa nobo, practicamente e mesun panorama compara cu 2009 y 2010. Na 2011, un total di 1143 negoshi “onshore” a keda registra na Camara di Comercio (KvK), cual ta un caida leve di 6 negoshi compara cu e 2010 unda a registra un total di 1149 negoshi. E ultimo tres añanan ta mustra un registracion di negoshi na nivel di mas o menos 1150 empresa (total on- y offshore), cual ta bastante mas abao compara cu e cantidad registra na 2007 (1337) y 2008 (1269). Den e grafico aki bao por mira un comparacion di registracion total di compania onshore y offshore di 2007 pa 2011.

Na 2011, casi 29% di negoshi nobo registra tabata ‘naamloze vennootschap’ (NV) (334); 61% tabata ‘eenmanszaak’. E 10% restante di registracion di negoshi nobo tabata trata di VOF, VBA, AVV of otro tipo di negoshi. Den esakinan ta resalta e crecemento remarcable di e VBA como forma legal. Na 2011 tabatin 35 registracion di VBA, compara cu solamente 20 na 2010. Un señal cu e VBA, cual ta mas barata pa lanta cu un NV, ta hayando mas popularidad.

 

Relacion registracion y crecemento economico

E tendencia di registracion modera di empresa nobo na 2011 ta exigi un splicacion, especialmente relaciona cu crecemento economico di nos pais expresa den nos Producto Interno Bruto (Gross Domestic Product, GDP). E cantidad di empresa nobo, alrededor di 1150 pa aña, en realidad ta representa solamente un minoria di e total di empresa activo den cualquier aña. Si no tin un aumento den empresa nobo registra, esey no ta implica automaticamente cu no tin un crecemento economico, ya cu esey ta depende mas tanto di e mayoria di empresa, cu ta esnan existente, y no esnan cu a bin acerca durante e aña ey mes. Esey ta parce di ta e caso tambe na 2011, unda cu

refineria di Valero a bolbe den operacion, mientras cu e contratistanan cu tabata entrega servicio na Valero tambe a bolbe den accion. Tambe tabatin bastante actividad den sector di construccion pa motibo di varios proyecto nobo, y un sector turistico cu a mustra un mehoracion compara cu 2010.  Di otro banda por señala sí cu e crecemento na 2011 tabata mas modera cu locual a anticipa promer.

 

Registracion segun districto

Den e cantidad di inscripcion di negoshi nobo segun districto, nos por nota cu no tin cambio mayor tampoco. E aña aki atrobe por observa cu e mayor parti di negoshi nobo registra tabata den e distritonan Oranjestad Oost, Oranjestad West y Noord. Nan tres, mescos cu na 2010, ta forma 68% di negoshi nobo registra. E dos districtonan cu mas a crece porcentualmente den negoshi nobo na 2011 ta Noord cu 22% y Savaneta cu 8%, compara cu 2010. San Nicolas Noord y Zuid hunto a conoce un crecemento leve di casi 5%. Oranjestad Oost y West hunto a conoce un caida den negoshi nobo di 12% den 2011, principalmente e caida aki tabata na parti Oost. Apesar di esaki nan ta keda pertenece na e districtonan cu mas negoshi estableci. Ariba e chart aki bao por mira e cantidad di negoshi nobo pa districto.

Registracion segun tipo di negoshi

Na 2011, por observa cu registracion segun tipo di negoshi ta keda mas o menos igual na esnan registra den 2010. E aña aki atrobe por nota cu e crecemento principal ta den e sectornan di construccion, restaurant y tienda di paña y/of sapato, igual na 2010. Otro  sectornan cu cantidad grandi di registracion na 2011 ta keda peluqueria, take-away, real estate y ‘holding’, como tambe supermercado, minimarket, souvenirshops  y compania di limpieza. Hunto e sectornan aki ta forma 43,5% di e cantidad di compania registra na 2011. Den e siguiente imagen por mira e diez tipo di negoshi mas registra na 2011.

Den e anexo cu ta acompaña e recado di prensa aki por mira algun otro detaye tocante registracion.

 

Aruba, 11 di april 2012

Camara di Comercio y Industria (KvK)

 

 

By orbitalnets.com