Connect to Us LinkedIn Youtube RSS

08-2018 - KvK a reuni cu sindicato di Douane pa compronde nan banda di situacion
  • PDF
  • Print
  • Email
Oranjestad – Diamars, 6 di februari ultimo Camara di Comercio y Industria di Aruba (KvK) a tene un re cu sindicato di Douane SADA pa por scucha di nan banda encuanto e situacion pa cu e convenio di inschaling y salario nobo pa Douane. E re tabata uno fructifero caminda cu e sindicato a splica cu nan meta den tur esaki ta pa haya reaccion al caso di parti di Minister di Finanza, Economia y Cultura riba e convenio y ta lamenta e falta di comunicacion cu tabata tin te awe.
 
Douane ta na altura di nan contribucion na caha di Gobierno y influencia cu algun accion di nan banda tin pa na economia di Aruba. Nan a indica cu nan kier a haya oido cerca Minister sin tin mester di recuri na tuma accion extremo. E no ta e intencion pa organisa un welga, cual impacto lo ta mucho grandi pa pais Aruba. Loke si a tuma luga ta un re cu tur e miembronan di e sindicato durante ora di trabou. Douane semper ta opta na otro formanan pa tuma accion prome cu considera pone trabou un banda.
 
KvK a informa di su banda cu e accion di poco ora aki toch a hasi un efecto di preocupacion den mundo comercial y a causa algun leve retraso den salida di carga e dia ey, douane a splica cu a hasi un accion di recupercacion di e retraso aki y tabata tin atencion pa carganan vital pa nos economia por drenta mercado durante di nan re. KvK di su parti ta haci un apelacion na Minister di Finanza, Economia y Cultura pa reacciona riba e peticion di Douane. Ta pidi pa trece dilanti claridad riba e conseho cu Minister tin encuanto e convenio y ki accion lo ser tuma mirando cu esaki lo mester a wordo implementa dia 1 di januari 2018. KvK ta tuma nota di esaki y ta keda pendiente pa aclaracion di e Minister. 
 
KvK kier gradici sindicato SADA  pa acepta e invitacion pa reuni y ta hopi satisfecho cu e resultado. KvK ta desea pa pronto bin cu un solucion pa e situacion aki.
 
 
Aruba, 7 di februari 2018
Camara di Comercio y Industria (KvK)
alt alt
 
 

By orbitalnets.com