Connect to Us LinkedIn Youtube RSS

23-2017 - Falta algun ora mas pa e prome debate electoral 2017
  • PDF
  • Print
  • Email
Oranjestad – Awe anochi lo tuma luga e prome debate electoral entre e 7 partidonan politico cu a registra. Camara di Comercio (KvK) ta extende un invitacion na tur simpatizante y pueblo votador pa bin presencia e debate dia 8 juni den e Grand Ballroom di Marriott. Awe lo tin carchi pa e evento disponibel na balie di KvK y tambe si sobra lo por cumpra carchi na entrada e anochi di debate. Lo tin posibilidad pa cumpra bo ticket cash of via ATM card. Nos ta recomenda pa no warda te ultimo pa busca esun dibo!
 
Regla pa participantenan y pa publico encuanto interupcion
KvK ta stipula algun regla tanto pa e participantenan como pa publico presente. Esaki pa mantene e orden y brinda un evento na un nivel halto. Ta prohibi pa e publico presente interumpi e debate. No ta permiti pa e participantenan interumpi y/o stroba otro durante nan discurso. Aplauso ta permisibel unicamente despues di contestacion di un pregunta y tambe na final di e programa. Solamente e moderador por interumpi e participantenan durante nan discurso.
 
Reglanan di conducta pa participante 
Ta importante pa e participantenan respeta otro y sigui e instruccionan di e moderador y e panel pa huntu contribui na un debate transparente y di nivel.
Tur participante mester atene su mes na e reglanan di e debate
Tur participante lo ricibi e topiconan di e debate prome cu e debate y no lo tin oportunidad pa prepara durante di e debate
No haci propaganda politico como parti di reaccion ni di contesta riba un pregunta 
Tur participante lo duna un contesta bon argumenta, tanto como reaccion como tambe contesta riba e preguntanan
E contesta (y argumentacion) mester ta obhetivo, cortico y al caso
Contestanan emocional pa toca e sentimento di e publico ta permisibel, basta cu no trata di maneha e publico na antoho
No interumpi e debate 
No stroba ni papia ora cu un otro participante ta na palabra
No discuti, grita, altera, ofende, discrimina ni ataca otro personalmente, etc.
 
Reglanan di conducta pa publico 
No interumpi e debate
No stroba ni ofende otro persona vociferando opinion, propaganda o preferencia politico
No interumpi, stroba, descurasha ni ofende ningun lider politico
No discuti, grita, altera, ofende, discrimina ni ataca otro, etc.
No ta permiti pa trece material di promocion politico na e evento (incl. stickers, bandera, etc.). Ta importante pa publico tin un bon comportacion na tur momento y e reglanan di conducta lo wordo anuncia door di e moderador na comienso di e evento y si ta necesario lo wordo ripiti durante di e evento.
Personanan cu mal conducta y cu no atene nan mes na e reglanan di conducta lo wordo atendi riba esaki door di e moderador verbalmente (1 advertencia). Si e persona no corigi e mal conducta, e lo wordo pidi pa bandona e sala di inmediato y lo wordo escolta door di siguridad pafo di e sala.
 
E dos debatenan lo tuma luga den e ballroom di Marriott Grand Ballroom y lo ser transmiti tambe en bibo via Tele-Aruba.
 
KvK ta haya importante pa e eleccion ta uno transparente y kier contribui pa e pueblo votado por scucha di e lidernan di e partidonan participante kico ta nan punto di bista riba e diferente topiconan cu lo wordo treci dilanti y cu ta na interes general di Aruba.
 
Pa cualkier otro informacion y/of pregunta por tuma contacto cu KvK via 582-1566 ext. 27/30/35/42 of via e-mail: This e-mail address is being protected from spambots. You need JavaScript enabled to view it . Tambe por bishita e website di KvK www.arubachamber.com y su pagina riba Facebook pa asina keda informa.   
 
 
Aruba, 8 di juni 2017
Camara di Comercio y Industria (KvK)
 
 
 
 

By orbitalnets.com