Connect to Us LinkedIn Youtube RSS

10-2017 - Camara di Comercio a tene un segundo reunion cu fraccion di AVP
  • PDF
  • Print
  • Email
Oranjestad –  Manera a wordo acorda na final di e prome reunion entre fraccion di AVP y Camara di Comercio (KvK), a tuma lugar e segundo reunion pa asina sigui elabora riba e puntonan di agenda. Algun topico cu a wordo dialoga extensivamente durante e prome reunion ta e.o. situacion di Caya Grandi, sosten na e empresario hoben y “micro financing” pa empresario. Riba e temanan aki a wordo acorda cu KvK lo bai trece ideanan dilanti riba cua fraccion di AVP lo por duna nan opinion y asina cana e caminda pa yega na solucionan concreto. Fraccion di AVP ta mira e importancia pa tuma den consideracion e opinion y sugerencianan di KvK riba comercio pa asina yuda den e desaroyo economico di Aruba.
 
E di dos reunion tambe a bai hopi bon y a papia encuanto seguridad tur caminda en particular pa e empresario y su negoshi, un update encuanto CITGO su desaroyo y situacion laboral, desaroyonan pa cu ROPV y infrastructura di Aruba y por ultimo a toca e tema di e plan cu tin pa cu dump y procesa sushi na Aruba. KvK a discuti cada un di e topiconan cu fraccion di AVP y a haci diferente remarke y preguntanan critico pa asina por haya un bista riba con fraccion di AVP ta opina riba esakinan. Fraccion di AVP di su banda a trece dilanti kico e situacion ta actualmente y kico e plan di accion ta di banda di fraccion di AVP.
 
E reunion a culmina cu esnan presente indicando cu e intercambio di opinion y ideanan treci dilanti ta hopi interesante y lo bai tuma e pasonan necesario pa por formalisa nan pa e bienestar general di Aruba.
 
KvK ta recorda un y tur riba e fecha cu e debatenan lo tuma lugar cu ta diahuebs, 8 juni 2017 y diahuebs, 17 augustus 2017. E debatenan lo ser transmiti en bibo via Tele-Aruba. Pronto KvK lo comparti mas informacion encuanto e debatenan.   
 
 
Aruba, 2 di maart 2017
Camara di Comercio y Industria (KvK)
 

By orbitalnets.com