Connect to Us LinkedIn Youtube RSS

CAMARA DI COMERCIO Y INDUSTRIA ARUBA TA CUMPLI 80 AÑA DI EXISTENCIA
  • PDF
  • Print
  • Email

Riba dia 8 di september 1930 Camara di Comercio y Industria (KvK) a keda institui pa un decreto di Gobernador di e colonia Curaçao, señor van Slobbe. Algo mas cu cincuenta comerciante a reuni dia 11 di november 1929 y a dicidi cu ta necesario pa Aruba tin su propio Camara di Comercio cu por boga pa nan interes y a logra nan meta un aña despues.

Mirando bek riba e 80 añanan di existencia, KvK a hunga un papel importante den e desaroyo di nos pais, unda nos tur a experiencia cambionan mayor den e economia di Aruba. Algun ehemplo ta cambio di actividad comercial principal di refinacion di petroleo pa turismo, nos Status Aparte, nos centro di actividad economico a cambia di San Nicolas pa Playa, y actualmente ta concentra den e area di hotel etc.

Tambe e organizacion interno y e manera di traha na Camara di Comercio a cambia hopi. Di un directiva di 9 miembro den e prome decadanan KvK a crece bira un organisacion di servicio profesional cu 17 empleado trahando full time. Nos servicio a expande, for di duna liderazgo y boga pa interes di miembro te na administracion di Registro Comercial y di Fundacion y di duna informacion y aporte na empresario y inversionista. Tambe KvK na e momento aki ta e orguyoso propietario di su edificio na e Parke Comercial y Financiero na J.E. Irausquin Blvd., cual a ser diseña pa un compania di arquitectura di un nieto di Habibe N.S. (Julio) Habibe, cofundador di Camara di Comercio.

 

Camara di Comercio por wak bek riba 80 aña cu hopi acontecimento y reto cu a ser surpasa. Pa KvK por keda contribui di un forma constructivo y di calidad na desaroyo di nos pais, a dicidi di traha riba un plan strategico pa e siguiente añanan. Den e proceso pa bin cu e plan aki a envolvi diferente stakeholders y a yega na un plan cu lo wordo ehecuta for di awor en adelante. E plan ta enfoca riba e stimulacion di actividadnan comercial cu atencion especial pa desaroyo sostenible. Tambe lo dedica atencion na e ampliacion di conocemento cerca e comerciante y publico en general di e responsabilidad y tareanan di KvK.

Den transcurso di aña KvK lo organisa varios evento informativo y interactivo pa diferente grupo den nos comunidad. Esaki tin como meta pa yuda stimula e espiritu empresarial di nos poblacion. Den esaki hubentud tambe lo haya su atencion debido pa asina nan tambe ta conciente di e oportunidadnan cu tin pa nan. Mas tocante e diferente actividadnan lo ser anuncia despues.

 

By orbitalnets.com